17 avqust 2012 00:38
“İsraillə oyunda tamamilə fərqli futbol görəcəksiz”
Futbol üzrə Azərbaycan yığmasının və “Qarabağ”ın hücumçusu Rauf Əliyev Bəhreynlə yoldaşlıq oyunundan (3:0) sonra fikirlərini paylaşıb. Azerisport.az saytına müsahibəsində o, öncə bunları dilə gətirib:
“Çox şadam ki, qələbə qazandıq. Özü də belə hesabla. Əlbəttə, belə istidə oynamaq heç də asan deyildi. Bu, öz təsirini göstərirdi. Amma oyun arxada qalıb və artıq bunun heç bir əhəmiyyəti yoxdu. Əsas qələbə qazanmaq idi ki, ona da nail olduq. Çünki doğma meydanda, azarkeşlərimizin gözü qarşısında oynadığımız üçün, buna borclu idik”.
“Çox şadam ki, qələbə qazandıq. Özü də belə hesabla. Əlbəttə, belə istidə oynamaq heç də asan deyildi. Bu, öz təsirini göstərirdi. Amma oyun arxada qalıb və artıq bunun heç bir əhəmiyyəti yoxdu. Əsas qələbə qazanmaq idi ki, ona da nail olduq. Çünki doğma meydanda, azarkeşlərimizin gözü qarşısında oynadığımız üçün, buna borclu idik”.
Millimizin gənc hücumçusu öz çıxışını da dəyərləndirib: “Nə deyə bilərəm? Çalışdım ki, yaxşı oyun sərgiləyim. Amma hər şey istədiyim kimi alınmadı. Öz çıxışımdan narazı qaldım. Bir hissə oynasam da, qol vurmaq imkanım oldu. Sadəcə, həmin epizoddan yararlana bilmədim”.
Əliyevin sözlərinə görə, həm onun, həm də komandanın daha yaxşı oyun sərgiləməyinə daha çox isti hava şəraiti təsir edib: “Şəxsən mən ilk hissədən sonra güclə nəfəs alırdım. Belə hava şəraitində oynamaq çox ağır idi. Fasiləyə çıxanda azarkeşlərə diqqət yetirdim. İsti hava olmasına rəğmən, onlar bizi dəstəksiz qoymamışdılar. Onlara da çətin idi. İndi təsəvvür edin ki, meydanda qaçan futbolçular nələr çəkirdilər”.
Rauf yığmamızın bu qələbəsinin dünya çempionatının seçmə mərhələsi çərçivəsində İsrailə qarşı keçirəcəyimiz ilk oyun öncəsi psixoloji baxımdan çox faydalı olduğunu düşünür: “Düzdü, biz gözəl başa düşürük ki, İsrail yığması Bəhreyndən çox fərqlənir. Həmin oyunda tamamilə fərqli futbol görəcəksiz. Amma istənilən halda bu qələbə bizdə özünəinamı artırmış oldu. İnanıram ki, sentyabrın 7-də israillilərə qarşı da yaxşı oyun sərgiləyə biləcəyik”.
Millimizin baş məşqçisi Berti Foqts İsraillə oyunun hazırlıqlarına avqustun 28-dən start verəcək. “Qarabağ”ın forvardı bu amilin komandaya faydalı olacağını deyir: “Fikrimcə, belə çətin oyun öncəsi komandanı bir qədər tez toplamaq heç də pis olmaz. Belə olan halda biz klubdakı çıxışımızdan sonra yenidən millinin oyunlarına köklənə biləcəyik”.
