20 avqust 2012 13:56
“Neftçi ilə oyuna ciddi şəkildə və məsuliyyətlə yanaşırıq”
Kiprin APOEL klubunun baş məşqçisi İvan Yovanoviç və futbolçuları Avropa Liqasının pley-off mərhələsindəki rəqibləri olan Azərbaycan çempionu “Neftçi”nin oyununu izləyiblər. Azerisport.az xəbər verir ki, Nikosiya klubu artıq rəqib düşərgədə özləri üçün ən təhlükəli futbolçuların kim olduğunu da müəyyənləşdirib.
Kipr mətbuatının yazdığına görə, APOEL futbolçuları “Neftçi”nin heyətində Julius Vobayı, Flavinyonu və Rodriqinyonu xüsusi fərqləndiriblər. Kiprlilər həmçinin “Neftçi”nin müdafiə futbolunu sevmədiyini vurğulayıblar. Məhz bu üzdən APOEL-in qarşıdakı oyunlarda taktiki dəyişikliklərə əl atmasının mümkünlüyü də diqqətə çatdırılıb.
Yovanoviç isə açıqlamasında bunları dilə gətirib: “Rəqibi diqqətlə öyrənməyimiz lazımdı. Biz onları qiymətləndirməyə bilmərik. “Neftçi” ilə oyuna digər rəqiblərimizdə olduğu kimi, ciddi şəkildə və məsuliyyətlə yanaşırıq”.
