21 avqust 2012 00:36
APOEL Neftçi ilə oyunlar öncəsi problemlə üzləşib
Azərbaycan çempionu “Neftçi”nin Avropa Liqasının pley-off mərhələsindəki rəqibi – Kiprin APOEL klubunun hücum xətti ilə bağlı problemləri yaranıb. Azerisport.az xəbər verir ki, bu barədə Kipr mətbuatı məlumat yayıb.
Məlumatda bildirilir ki, Nikosiya klubunun braziliyalı hücumçu Ayltonun Bakıda keçiriləcək ilk oyuna qədər sıraya dönüşü gözlənilsə də, o, tam bərpa olmayıb. Onun ən tez halda cavab görüşünə qədər sıraya dönməsi gözlənilir.
Ayltonla yanaşı komandanın argentinalı hücumçusu Esteban Solarinin də zədələndiyi bildirilir. Son xəbərlərə görə, o da Bakıdakı qarşılaşmada komandasına kömək edə bilməyəcək.
Belədə, baş məşqçi İvan Yovanoviç hücum xəttində yalnız Mario Budimir və Aldo Adornonun xidmətindən yararlana biləcək.
Qeyd edək ki, “Neftçi” ilə APOEL arasındakı ilk oyun avqustun 23-də Bakıda, “Dalğa Arena”da keçiriləcək. Oyun saat 21:00-da start götürəcək. Cavab qarşılaşması isə avqustun 30-da Nikosiyada oynanılacaq və saat 22:00-da başlayacaq.
