22 avqust 2012 21:05
Böyükağa Hacıyev: APOEL-i ilk oyunda 2:0 məğlub etsək, onları keçəcəyik
“Neftçi”nin baş məşqçisi Böyükağa Hacıyev UEFA Avropa Liqasının pley-off mərhələsi çərçivəsində Kiprin APOEL klubuna qarşı keçirəcəkləri ilk oyun öncəsi fikirlərini açıqlayıb. Azerisport.az xəbər verir ki, o, Bakıda baş tutacaq qarşılaşma ilə bağlı öncə bunları dilə gətirib:
“Bu, bizim üçün tarixi bir oyundu. Əgər bu mərhələni keçsək, Avroliqanın qrup mərhələsinə çıxacağıq. Hələ xəstəxanada olarkən APOEL-in oyunlarına baxırdım. Dəqiq deyə bilərəm ki, bu, çox güclü komandadı”.
Hacıyev bəyan edib ki, rəqibin güclü olmasına baxmayaraq, “Neftçi” müdafiə taktikası seçmək fikrində deyil: “Biz qapalı futbol oynamayacağıq. Qələbə qazanmaq üçün hər şeyi edəcəyik. “Neftçi”nin yaxşı potensialı var ki, APOEL-i keçə bilsin. Əgər Bakıdakı oyunda 2:0 hesabıyla qalib gələ bilsək, kiprliləri keçəcəyik. Bu, çox ideal nəticə olardı. Həmçinin sabah Nikolas Kanalesin ümidlərimi doğruldacağına inanıram”.
Baş məşqçi müalicə olunduğu dövrdə onu əvəzləmiş Tərlan Əhmədovun fəaliyyətinə də toxunub: “Əhmədovu yaxşı məşqçilik karyerası gözləyir. O, məni əvəzlədiyi dövrdə heç bir səhv buraxmadı”.
Hacıyev İqor Mitreskinin yenidən komandaya qaytarılmasına, eləcə də Rail Məlikovun gedişinə də toxunub: “Mən klub rəhbərliyindən xahiş etdim ki, Mitreskini əsas heyətə qaytarsınlar. Onlar da mənim bu xahişimi yerinə yetirdilər. Bizə belə təcrübəli futbolçu çox lazım idi. Railin gedişinə gəlincə, onun əvəzində komandaya Mahir Şükürov gəlib. Ona görə də bu mövqe bizi narahat etmir”.
Qeyd edək ki, “Neftçi” ilə APOEL arasındakı ilk oyun avqustun 23-də Bakıda, “Dalğa Arena”da keçiriləcək. Oyun saat 21:00-da start götürəcək. Cavab qarşılaşması isə avqustun 30-da Nikosiyada oynanılacaq və saat 22:00-da başlayacaq.
