24 avqust 2012 13:03
Berti Foqts yeni tsikl üçün 30 futbolçu seçdi
Futbol üzrə Azərbaycan millisinin 2014-cü il dünya çempionatının seçmə mərhələsi çərçivəsində keçirəcəyi ilk oyunlar üçün heyəti açıqlanıb. Azerisport.az xəbər verir ki, baş məşqçi Berti Foqts qarşıdakı iki oyun üçün 30 futbolçuya dəvət göndərib.
Alman çalışdırıcı 15-də Bəhreynlə keçirilən yoldaşlıq oyununa dəvət alan 21 futbolçunun hamısını yenidən yığmaya çağırıb. Onlardan başqa daha 9 futbolçu Foqtsun siyahısına düşüb. Aqil Məmmədov, Andrey Popoviç, Nodar Məmmədov, Arif Daşdəmirov, Aqil Nəbiyev, Bədavi Hüseynov, Mahir Şükürov, Nizami Hacıyev və Elvin Məmmədov yenidən yığmaya dəvət alıb.
30 futbolçudan 6-sı legionerdi. Belə ki, Foqts Türkiyənin “Eskişehirspor”, “Erciyesspor”, “Adana Demirspor”, Rusiyanın “Anji”, Almaniyanın “Hannover” və İspaniyanın “Elche” klublarının üzvlərinə dəvət göndərib.
Lakin bu, hələlik ilkin heyətdi. Güman ki, Bakıdakı təlim-məşq toplanışının gedişində Foqts bəzi futbolçuları millidən uzaqlaşdıracaq və yekun heyəti İsraillə oyun öncəsi açıqlayacaq.
Qeyd edək ki, sentyabrın 7-də Tofiq Bəhramov adına Respublika stadionunda İsraili qəbul edəcək milli 4 gün sonra Braqada Portuqaliyanın qonağı olacaq.
Qapıçılar: Kamran Ağayev (Xəzər Lənkəran), Anar Nəzirov (Qəbələ), Aqil Məmmədov (Bakı), Andrey Popoviç (Turan);
Müdafiəçilər: Rəşad Sadıqov, Maksim Medvedev (hər ikisi “Qarabağ”), Vurğun Hüseynov, Nodar Məmmədov (hər ikisi “Qəbələ”), Elnur Allahverdiyev, Ruslan Abışov (hər ikisi “Xəzər Lənkəran”), Vladimir Levin (İnter), Aqil Nəbiyev (AZAL), Arif Daşdəmirov (İnter), Bədavi Hüseynov (Anji, Rusiya), Ufuk Budak (Eskişehirspor, Türkiyə), Ali Gökdemir (Hannover, Almaniya), Mahir Şükürov (Neftçi);
Yarımmüdafiəçilər: Aleksandr Çertoqanov (Qəbələ), Rahid Əmirquliyev (Xəzər Lənkəran), Elvin Məmmədov (Bakı), Əfran İsmayılov (Qarabağ), Nizami Hacıyev (İnter), Cavid Hüseynov (Adana Demirspor, Türkiyə), Rizvan Umarov (Elche, İspaniya);
Hücumçular: Vüqar Nadirov, Rauf Əliyev, Vaqif Cavadov (hamısı “Qarabağ”), Branimir Subaşiç (Xəzər Lənkəran), Ruslan Qurbanov (Sumqayıt), Cihan Özkara (Erciyesspor, Türkiyə).
