24 avqust 2012 18:22
PFL-dən çıxışını dayandıran klublarla bağlı açıqlama
Xəbər verdiyimiz kimi, bu gün AFFA-nın inzibati binasında futbol üzrə Azərbaycan birinci divizionunun püşkatma mərasimi keçirilib. Azerisport.az xəbər verir ki, klub nümayəndələri və jurnalistlərin iştirak etdiyi mərasimi çıxış nitqi ilə açan Peşəkar Futbol Liqasının Mətbuat və İctimaiyyətlə Əlaqələr Departamentinin rəhbəri Aslan Şahgəldiyev tədbir iştirakçılarını salamladı:
“PFL-in prezidenti Ramin Musayev də tədbirimizdə iştirak edəcəkdi. Lakin bacısı bu gün vəfat etdiyindən tədbirimizə qatılmayacaq. Bu il birinci divizionda 13 komanda mübarizə aparacaq. Ötən çempionatın iştirakçılarından “Karvan”, “Muğan” və “MKT-Araz” birinci divizionda çıxış etmələri ilə bağlı bizə heç bir məlumat vermədilər. Ancaq çempionatda iki yeni komanda mübarizə aparacaq. Bunlar Ağsu təmsilçisi “Ağsu” və Bakının “Qala” komandalarıdı. Çempionata sentyabrın 8-də start veriləcək. Klublardan xahiş edirik ki, avqustun 31-dək sifariş vərəqələrini təqdim etsinlər və futbolçularla bütün müqavilə məsələlərini yekunlaşdırsınlar. Sifariş vərəqəsində 30 futbolçu ola bilər. Birinci divizionda legioner limiti ötən mövsümdə olduğu kimi 7+4 qalır. Bildiyiniz kimi Premyer Liqada çıxış edən komandalarının heyətlərində meydançada ən azı bir 21 yaşdan aşağı futbolçu olmalıdı. Bu qayda birinci diviziona şamil olunmasa da, kubok oyunları zamanı birinci divizion komandalarının da heyətində ən azı bir 21 yaşdan aşağı futbolçu olmalıdı. Ötən mövsüm olduğu kimi birinci divizionun qalibi Premyer Liqaya yüksələcək, ikinci yerin sahibi isə Premyer Liqada 11-ci yeri tutan komanda ilə pley-off oyunu keçirəcək. Ötən mövsüm lisenziyalaşma ilə bağlı müəyyən problemlər oldu. Ona görə də xahiş edirik ki, bu məsələlərdə bir qədər diqqətli olasınız”.
Daha sonra klub nümayəndələrinin iştirakı ilə püşkatma keçirildi.
