24 avqust 2012 19:08
“Çempion olmağı planlaşdırırıq”
Bu gün futbol üzrə Azərbaycan birinci divizionunun püşkatma mərasimi keçirildi. Azerisport.az xəbər verir ki, yeni mövsümdən etibarən birinci divizionda mübarizə aparacaq “Qala” klubunun baş məşqçisi Fəxrəddin Qaibov tədbirdən sonra fikirlərini bölüşdü:
“Püşkatmanın nəticəsinə əsasən səfərdə “Lokomotiv” ilə oynayacağıq. Rəqib haqqında heç bir məlumatım yoxdur. Ancaq biz qələbə qazanmaq üçün meydana çıxacağıq. Qarşımıza məqsəd qoymuşuq ki, layiqli mübarizə aparaq. Pis əsgər odur ki, general olmaq istəmir. Odur ki, biz də ancaq çempion olmağı planlaşdırırıq. Komandanın heyətinin tam formalaşdığını deyə bilmərəm. Bir neçə yoldaşlıq qarşılaşmasında qüvvəmizi sınamışıq. “Bakılı” ilə 1:1 heç-heçə etdik, MOİK-ə 2:1 hesabıyla qalib gəldik, “Şahdağ”a isə minimal hesabla məğlub olduq. Sentyabrın 1-də isə “Qaradağ Lökbətan” ilə yoldaşlıq görüşü keçirməyi planlaşdırırq”.
