24 avqust 2012 10:46
El Klasikoda yenə Barcelona güldü
Futbol üzrə İspaniya Super Kubokunda ilk oyun keçirilib. Azerisport.az xəbər verir ki, qarşılaşma dünyanın iki ən böyük klubu – “Barcelona” və “Real” arasında baş tutub.
Maraq üçün xatırladaq ki, “Barcelona” İspaniya kubokunun qalibi olduğu halda, “Real” La Liqanı qazanmışdı. İlk oyun Kataloniyada keçirilib və komandalar “Nou Kamp” stadionunda meydana çıxıblar. İlk yarısı sönük keçən qarşılaşmanın ikinci hissəsində qapılara 5 qol vurulub.
Bu oyun “Barcelona” və “Real” arasında 260-cı matç olub. İndiyədək kataloniyalılar 88, madridlilər 86 dəfə qələbəyə sevinib. 86 qarşılaşmada isə qalib müəyyənləşməyib.
Bu qarşılaşma Pep Qvardiolanın istefasından sonra baş məşqçi postuna keçən Tito Vilanovanın ilk “El Klasiko”su kimi tarixə düşüb. Ötən ilin avqustunda 5:4 hesabı ilə bitən qarşılaşmada Joze Mourinyo həmin vaxt Qvardiolanın köməkçisi olan Vilanovanın gözünə barmağını soxmuşdu. Bundan başqa “Barcelona”nın yeni transferi Jordi Alba ilk dəfə “El Klasiko”da iştirak edib.
Qeyd edək ki, “Barcelona” indiyədək Super Kuboku 10 dəfə qazanıb və kubokun son qalibidi. “Real” isə 8 dəfə qazandığı kuboku sonuncu dəfə 2008-ci ildə muzeyinə apara bilib.
Super Kubokun cavab oyunu sentyabrın 30-da Madriddəki “Santyaqo Bernabeu” stadionunda keçiriləcək.
İspaniya
Super Kubok
23 avqust
Barselona – Real - 3:2
Qollar: Pedro, 56, Messi, 70-pen, Xavi, 77 - Ronaldo, 55, Di Maria, 85.
