25 avqust 2012 13:31
Rəvanın yeni baş məşqçisi bəlli oldu
“Rəvan”ın yeni baş məşqçisi müəyyənləşib. Azerisport.az xəbər verir ki, ötən gün baş tutan Premyer Liqanın 4-cü turundan sonra türkiyəli məşqçi Cavad Gülərlə yollarını ayıran paytaxt klubu onun boşaltdığı postu yenidən Bəhmən Həsənova tapşırıb.
Qeyd edək ki, Bəhmən Həsənov ötən mövsüm də fasilələrlə iki dəfə “aslanlar”ın sükanı arxasında çalışmışdı. O, ilk dəfə 2011-ci ildə bu komandanın birinci məşqçisi olmuş Vladislav Qədirovu əvəzləmişdi. Lakin qısa müddətdən sonra yerini yenidən ona təhvil verməli olmuşdu. Nə qədər qəribə olsa da, bu ilin əvvəlində, ötən mövsümün sonlarında Qədirovun istefa verməsi nəticəsində Həsənov yenidən “Rəvan”ın sükanı arxasına keçmişdi. Amma yayda Bəhmən Həsənovun əvəzində komanda Cavad Gülərə tapşırılmışdı. Göründüyü kimi, indi Həsənov yenə onun yerinə gətirilmiş mütəxəssisi əvəzləyir. Hər halda bu, artıq “Rəvan” üçün əsl ənənə halını almaqdadı.
Maraq üçün bildirək ki, bu, Premyer Liqamızın cari mövsümündə 2-ci baş məşqçi dəyişikliyidi. "Rəvan"dan öncə "Kəpəz"in baş məşqçisi Fuad İsmayılov da istefa vermiş, onun Mahmud Qurbanov əvəzləmişdi.
