26 avqust 2012 13:59
Fenerbahçe prezidentindən şok qərar
Futbol üzrə Türkiyə Super Liqasının 2-ci turu çərçivəsində ötən gün keçirilən “Fenerbahçe” - “Gaziantepspor” matçında gözlənilməz hadisə baş verib. Azerisport.az xəbər verir ki, matç zamanı yerli fanatların braziliyalı futbolçu Alekslə bağlı müxtəlif şüarlar səsləndirməsinə qəzəblənən “Fenerbahçe” prezidenti Aziz Yıldırım buna etirazını orijinal şəkildə bildirib.
“Sarı lacivərdlilər”in 3:0 hesabıyla qələbə qazandığı görüşün gedişində “Aykut söylə, Aleks harda” şüarına əsəbləşən Yıldırım heç kimin gözləmədiyi halda mikrofonu əlinə alaraq, “Meydandakı futbolçulara sahib çıxın, onlara haqsızlıq etməyin” deyərək, hamını şoka salıb.
Amma bu hərəkəti həm Aziz Yıldırıma, həm də “Fenerbahçe”yə baha başa gələ bilər. Türkiyə mətbuatının yazdığına görə, futbol federasiyası oyunlar zamanı stadionda yalnız müəyyən çərçivələr daxilində açıqlamalara icazə verir. Hansısa klub prezidentinin, özü də bu şəkildə azarkeşlərə müraciəti isə qanunsuz sayılır. İcazəsiz anonslara görə TFF klubları 10-30 min Türkiyə lirəsi məbləğində cərimə edə bilər.
Qeyd edək ki, hazırda “Fenerbahçe”nin baş məşqçisi Aykut Kocamanla komandanın aparıcı futbolçusu və kapitanı Aleks arasında böyük narazılıq yaranıb. Öncə Çempionlar Liqası çərçivəsində Moskva “Spartak”ına qarşı oyunda bu futbolçunu ehtiyatda saxlayan baş məşqçi ötən gün baş tutan Super Liqa matçında ümumiyyətlə onun adını “18-liy”ə daxil etməmişdi. Amma klub prezidenti Aziz Yıldırım baş məşqçinin bu qərarlarına görə azarkeşlərin addımını pisləyib və ona dəstək çıxıb. O, həmçinin braziliyalı futbolçu ilə xüsusi söhbət edəcəyini də bildirib.
