27 avqust 2012 17:56
Premyer Liqamızın bahalı futbolçuları
Azerisport.az sizi hazırda futbol üzrə Azərbaycan Premyer Liqasında çıxış edən ən bahalı futbolçuların siyahısı ilə tanış edir. Yəqin ki, ölkəmizdə top qovan ən bahalı oyunçuların kimliyi sizi də az maraqlandırmır.
Qeyd edək ki, bu siyahı məşhur transfermarket.de saytının yaydığı rəqəmlər əsasında tərtib olunub.
1. Dieqo Kosta Silva (Qəbələ)
33 yaşlı braziliyalı qapıçı Azərbaycan çempionatındakı ən bahalı futbolçu hesab olunur. Onun qiyməti düz 1 milyon avroya bərabərdi.
2. Omar Kalabane (Qəbələ)
Qvineya yığmasının 31 yaşlı müdafiəçisi də öz komanda yoldaşından geri qalmır. Onun da dəyəri hazırda 1 milyon avro məbləğində olduğu bildirilir.
3. Lorival Rodriqo Assis (Qəbələ)
Nə qədər qəribə olsa da, ilk üçlükdə yer alan digər futbolçu – Assis də məhz “Qəbələ”nin şərəfini qoruyur. 28 yaşlı bu futbolçu 900 min avro dəyərindədi.
4. Viktor Mendi (Qəbələ)
30 yaşlı hücumçu ilk üçlükdəki futbolçulardan fərqli olaraq, ötən mövsümdən Azərbaycandadı. Fransa və Seneqal vətəndaşlığı olan bu oyunçunun qiyməti isə 850 min avrodu.
5. Vangelis Mantsios (Bakı)
29 yaşlı yunan forvard da Mendi kimi 850 000 avro dəyərindədi.
6. Rodriqinyo (Neftçi)
“Neftçi”nin aparıcı futbolçularından olan bu yarımmüdafiəçi isə 750 000 avroyadı.
7. Saşa Stamenkoviç (Neftçi)
Azərbaycan çempionunun əsas çərçivə qoruyucusu 700 min avro ilə dəyərləndirilir.
8. Rəşad Sadıqov (Qarabağ)
Futbol üzrə Azərbaycan yığmasının lideri yerli futbolçular arasında ən dəyərli oyunçu sayılır. 30 yaşlı həmyerlimizin qiyməti isə 650 000 ilə ölçülür.
9. Leandro Beçerra (Bakı)
“Zolaqlılar”ın 28 yaşlı yeni futbolçusunun da qiyməti 650 000 göstərilir.
10. Rail Məlikov (klubsuz)
Nə qədər təəccüblü olsa da, hazırda klubsuz olan Məlikov ölkəmizin ən bahalı futbolçularından biri sayılır. Onun da qiyməti 650 000 min dəyərindədi.
