28 avqust 2012 16:34
“Bura tarix yazmaq üçün gəlmişəm”
Azərbaycan Premyer Liqasında 4-cü turun “Sumqayıt”la keçirilən oyun “Qəbələ”nin yeni transferi Lorival Assis üçün əlamətdar olub. Azerisport.az xəbər verir ki, braziliyalı futbolçu bu görüşdə assistentlik bacarığını nümayiş etdirib.
Matçın 33-cü dəqiqəsində Assisin ötürməsindən sonra Bruno da Silva hesabı bərabərləşdirir. 20 dəqiqə sonra Assisin küncdən zərbəsini Omar Kalabane başla tamamlayır və “Qəbələ” “Sumqayıt” qarşısında önə keçir. 2 dəqiqə sonra isə (55-ci dəqiqə) sol cinahdan cərimə meydançasına daxil olan Assisin qapı ağzına dəqiq ötürməsini Rəşad Abdullayev eyni dəqiqliklə tamamlayır – 3:1. Matçın 71-ci dəqiqəsində yenə Assisin künc zərbəsi və yenə Kalabane başla fərqlənir – 4:1.
“Qəbələ” “Sumqayıt”la matçda hesabda geri düşsə də, komandanın əzmkar oyunu sonda rəqibin darmadağınını qaçılmaz edib. Qonaqların qapısından 4 qol keçirən Fatih Kavlakın yetirmələri doğma meydançada ardıcıl 4-cü qələbələrini qazanıblar. Təbii ki bu uğurlu nəticənin əldə olunmasında qola imza atanlar qədər qol ötürməsi verənlərin də rolu böyükdür. “Sumqayıt”la matçda isə son həlledici zərbəni vuranlar fərqli olsalar da, assistent rolunu oynayan bir futbolçu var idi – Lorival Assis.
“Qəbələ”yə mövsümün əvvəlində qoşulan braziliyalı qısa müddətdə komandaya uyğunlaşması ilə diqqət çəkir. Meydançaya çıxdığı 4 oyunda 1 qol (“Qəbələ” – “İnter” 1:0) vuran və 4 məhsuldar ötürmə ilə yadda qalan Assis klubun rəsmi saytına açıqlamasında komandanın uğurunda pay sahibi olduğu üçün özünü xoşbəxt hiss etdiyini deyib:
“Gərgin oyun alındı. Matça istədiyimiz kimi başlaya bilməsək də, sonradan üstünlüyü ələ keçirməyi bacardıq. Təzyiqimiz öz bəhrəsini verdi və böyükhesablı qələbə qazandıq. Qələbədə pay sahibi olduğum üçün özümü xoşbəxt hiss edirəm. Gələcək oyunlarda daha yaxşı olacaq. Mən daha əvvəl də demişdim – “Qəbələ”yə tarix yazmaq üçün gəlmişəm. Bunun öhdəsindən gələcəyimə inanıram”.
