29 avqust 2012 13:43
Berti Foqts 7 futbolçunun xidmətindən məhrum oldu
Xəbər verdiyimiz kimi, futbol üzrə Azərbaycan yığması ötən gündən etibarən bir araya gəlib. Azerisport.az xəbər verir ki, millimiz DÇ-2014-ün seçmə mərhələsi çərçivəsindəki İsrail (7 sentyabr, Bakı) və Portuqaliya (11 sentyabr, Braqa) ilə oyunların hazırlığına başlayıb.
Məlum olduğu kimi, Berti Foqts yığmamızın heyətində 30 futbolçu dəvət etmişdi. Amma onların heç də hamısı yığmaya təşrif buyurmayıb. Belə ki, almaniyalı mütəxəssis hazırda cəmi 23 futbolçu ilə hazırlıq keçir.
Xarici klublarda çıxış edən futbolçularımız isə milli komandamızın düşərgəsinə buraxılmayıblar. Bu üzdən də millimiz Bakıdakı hazırlıqlara legionerlərsiz başlayıb.
Məlum olduğu kimi, klublar futbolçularını millinin düşərgəsinə rəsmi oyunlardan 48 saat öncə buraxmağa borcludu. Bu səbəbdən milliyə dəvət alan 6 futbolçu hələ Bakıya gəlməyib. Onların bu həftə klublarında oyunları olduğundan yığmaya sentyabrda qoşulacaqlar. Qeyd edək ki, Foqts “Anji”nin əvəzedici komandasından Bədavi Hüseynova, “Eskişehirspor”dan Ufuk Budağa, “Adana Demirspor”dan Cavid Hüseynova, “Erciyesspor”dan Cihan Özkaraya, “Hannover”dən Ali Gökdemirə və “Elche”dən Rizvan Umarova dəvət göndərib. Onlarla yanaşı “Neftçi” ilə Avropa Liqasında vacib oyuna çıxacaq Mahir Şükürov da hələlik yığmaya qoşulmayıb.
