29 avqust 2012 17:02
Ağasəlim Mircavadov: Neftçi APOEL-in hər səhvindən maksimum yararlanmalıdı
Futbol üzrə Azərbaycan yığmasının sabiq baş məşqçisi Ağasəlim Mircavadov “Neftçi”nin UEFA Avropa Liqasının pley-off mərhələsi çərçivəsində Kiprin APOEL klubuna qarşı keçirəcəyi cavab oyunu öncəsi fikirlərini açıqlayıb. Azerisport.az saytına müsahibəsində o, Nikosiyada baş tutacaq qarşılaşma ilə bağlı bunları dilə gətirib:
“Komanda cavab matçında da özünü göstərməlidi. Bakıdakı oyunda “Neftçi” əla təsir bağışlamışdı. Amma bunu cavab oyununda da təkrarlamaq lazımdı. “Neftçi”də lider çatışmazlığı var. Hansı ki, oyunu üzərinə götürüb, təkbaşına hansısa görüşün taleyini həll etməyi bacarsın. Müdafiədə diqqətli olmaq lazımdı. Onda şansımız olacaq. Rəqibin hər səhvindən maksimum yararlanmaq lazımdı”.
Qeyd edək ki, “Neftçi” ilə APOEL arasındakı ilk oyun avqustun 23-də Bakıda keçirilmiş və 1:1 hesabıyla başa çatmışdı. Cavab qarşılaşması isə avqustun 30-da oynanılacaq və saat 22:00-da başlayacaq.
