Simurq Gürcüstanda ilk məşqə çıxdı

Xəbər verdiyimiz kimi, dünya çempionatının seçim mərhələsinin oyunları ilə əlaqədar olaraq Premyer Liqada yaranan fasilədən istifadə edən "Simurq" Gürcüstana təlim-məşq toplanışına yollanıb. Azerisport.az xəbər verir ki, Tiflis şəhərində yerləşən "Kopala" otelində məskunlaşan komanda artıq qonşu ölkədə ilk məşqinə çıxıb.

 

İki saata yaxın davam edən hazırlıq prosesində Georgi Çixradzenin yetirmələri isinmə hərəkətlərindən sonra qısa ötürmələr üzərində çalışıblar. Daha sonra üç qrupa bölünən futbolçular iki tərəfli oyunla bu günlük hazırlıqları tamamlayıblar.

 

Gürcü mütəxəssis Gürcüstanda təşkil olunmuş təlim-məşq toplanışına əvəzedici heyətdən Arzuman Nəsibov, Həsən Qəhramanov, Ruslan Getmanı da cəlb edib.

 

Qeyd edək ki, "Simurq" sentyabrın 9-na qədər qonşu ölkədə qalacaq. “Sarı-qaralar” gündə iki dəfə olmaqla təlim-məşq toplanışını davam etdirəcək.