1 sentyabr 2012 00:18
David Odikadze yenidən Bakı İnterində (FOTO)
Gürcüstanda təlim-məşq toplanışını davam etdirən "İnter" ötən gün səhər məşqində sürprizlə üzləşib. Azerisport.az xəbər verir ki, 2009-2011-ci illərdə "İnter"də çıxış etmiş gürcüstanlı yarımmüdafiəçi David Odikadze sabiq komandasının məşqinə baş çəkib. Uzun zaman görmədiyi köhnə komanda yoldaşları ilə görüşən David, daha sonra klubun baş məşqçisi Kaxaber Tsxadadze ilə söhbət edib.
Hazırda "Çixura Saçxere" klubunun formasını geyinən David Odikadze açıqlama da verib:
"Uzun müddət "İnter"də birgə oynadığım komanda yoldaşlarımı görməmişəm. Məhz bu səbəbə görə "İnter"in məşqinə gəldim və uşaqlarla yenidən görüşdüm. "İnter" mənim karyeramda çox önəmli yer tutur, bu komandanın heyətində mən Azərbaycan çempionu və Birlik Kubokunun qalibi olmuşam. Bu komandada unudulmaz illər keçirmişəm. "İnter"dən ayrılsam da, bu klubun mənim ürəyimdə xüsusi yeri var. Boş vaxtım olanda "İnter"in oyunlarını internet vasitəsi ilə izləyirəm, hazırki komandanın çox böyük potensialı var. Zənnimcə, "İnter" bu mövsüm çempionluq uğrunda mübarizə aparacaq. Çempionluq yolunda doğma komandama uğurlar arzulayıram".
