1 sentyabr 2012 00:54
“Uğurlu çıxış edib, üst pillələrə qalxmaq istəyirik”
“Sumqayıt” Futbol Klubunun əvəzediciləri çempionatda yaranmış fasilədən maksimum yararlanmaqdadı. Azerisport.az xəbər verir ki, komanda gün ərzində iki dəfə olmaqla hazırlığını Mehdi Hüseynzadə adına Sumqayıt şəhər stadionunda davam etdirir.
Əvəzedicilərin baş məşqçisi Vaqif Paşayev arxada qalan oyunlar və hazırlıq prosesi barəsində klubun rəsmi saytına açıqlama verib: “Çempionatda 4 oyun keçirmişik. Bu görüşlərdə bir qələbə, bir məğlubiyyət və iki heç-heçəyə imza atmışıq. Ümumilikdə götürsək, komandamdan arxada qalan dörd turda razı qalmadım. Düşünürdük ki, bu günə qədər ən azı 9 xal toplamalı idik. Bizim komandamız çempionatın ən gənc kollektivlərindən biridir. Yay fasiləsi zamanı klubun akademiyasından 10 futbolçunu heyətə cəlb etdik. Onlardan artıq bir neçəsi əsas heyətdə meydana çıxıb. Ümumilikdə götürsək, hazırda bəzi problemlərimiz var. Milli komandanın oyunları ilə əlaqədar yaranmış fasilə bizim üçün çox önməli idi. Dörd oyunu analiz edib səhvlərimiz üzərində çalışacağıq. “Sumqayıt” Futbol Klubunun əvəzedici komandasının əsas məqsədi əsas komanda üçün futbolçu hazırlamaqdır. Artıq komandamızın iki üzvü əsas komandaya cəlb olunub. Düşünürəm ki, yaxın gələcəkdə bu say artacaq. Hazırda gün ərzində iki dəfə məşq etməklə hazırlığımız davam etdiririk. Uşaqlar meydanda var qüvvələri ilə çalışır. Qarşıda bizi olduqca çətin oyunlar gözləyir. Uğurlu çıxış edib, bacardığımız qədər turnir cədvəlinin üst pillələrinə qalxmaq istəyirik”.
