3 sentyabr 2012 13:59
Mahir Şükürov: Ronaldoya qarşı oynamaq mənə daha asan olar
Futbol üzrə Azərbaycan yığmasının və “Neftçi”nin müdafiəçisi Mahir Şükürov azerisport.az saytına müsahibəsində komandasının Avropa Liqasında tarix yazmasından, eləcə də millimizin qarşıdakı oyunlarından danışıb.
“Keçirdiyimiz sonuncu çətin oyunun ardından yenicə özümə gəlirəm. Kiprdən qayıdandan sonra yığmanın düşərgəsinə qoşulmuşam. Uşaqlar sağ olsunlar, məni yaxşı qarşıladılar (gülür). Hamısı təbrik etdi. Oyun haqda soruşdular. Hamı yaxşı başa düşür ki, bu qələbə bütün futbolçular üçün böyük xidmətdi. Əminəm ki, bundan sonra klublarımıza münasibət daha yaxşı olacaq”.
Şükürov hələ də komandasının tarixi zəfərinin sevincini yaşayır: “Çox şadam ki, belə tarixi oyunda mən də iştirak edə bildim. Çempionlar Liqasının ötən mövsümündə sürprizlərə imza atmış bir komanda üzərində qələbə az iş deyil. Bu, Azərbaycan futbolu üçün böyük uğurdu. Püşkatmaya gəlincə, bizə çətin qrup düşüb. Daha keçiləsi komandalardan ibarət qruplar var”.
O, komandasının qrup mərhələsindəki şanslarından da danışıb: “Amma çətin rəqiblərlə düşməyimizə baxmayaraq, şansımız var. Təkcə “Partizan”ı yox, “Rubin”i də keçə bilərik. Yəni “Terek”in səfərdə udduğu komandanı məğlub edə bilməyəcəyik? Biz Kiprə gedəndə də komandaya inanmırdılar. Hesab edirəm ki, Avropa Liqasının qrup mərhələsində oyuna çıxmaq çox xoş olacaq. Vaxtilə biz “İnter” kimi komandalara belə turnirlərdə azarkeşlik edirdik. İndi isə belə komanda ilə oynamaq şansımız var”.
30 yaşlı müdafiəçi sonda yığmamızın qarşıdakı İsrail və Portuqaliya ilə oyunlarından da danışıb: “Hələlik rəqiblərimiz barədə heç nə bilmirəm. Onların son oyunlarını görməmişəm. Amma hər halda seçmə mərhələnin ilk oyununda qələbə qazanmağa çalışacağıq. İsraillə öz meydanımızda keçirəcəyimiz oyunda xal itirmək istəməzdik. İkinci oyunda isə daha güclü rəqiblər qarşılaşacağıq. Hesab edirəm ki, Portuqaliyanın heyətində Ronaldonun bizə qarşı oynamaması nəyisə dəyişmir. Onların heyətində onsuz da yüksək səviyyəli futbolçular yetərincədi. Mənim üçün Ronaldoya qarşı oynamaq daha asan olardı. Çünki onun yerinə çıxacaq digər futbolçu dəridən-qabıqdan çıxacaq ki, özünü göstərsin”.
