5 sentyabr 2012 00:27
“Neftçinin belə klublara da dişini göstərməsinin zamanı yetişib”
AZAL-ın baş məşqçisi Vaqif Sadıqov azerisport.az saytına müsahibəsində Premyer Liqadakı çıxışlarından, “Neftçi”nin Avropa Liqasındakı uğurundan, eləcə də yığmamızın DÇ-2014-ün seçmə mərhələsi çərçivəsində keçirəcəyi görüşlərdən danışıb.
“Əsas heyətin yeddi üzvünün müxtəlif yığmaların düşərgəsinə yollanmasına baxmayaraq, biz gənclərdən ibarət yığmaya qarşı yaxşı oyun sərgilədik. Şadam ki, bu oyunda qələbə qazandıq (1:0). Düzdü, bu, sadəcə yoxlama oyunu idi. Amma yenə də hər oyunda qələbə qazanmaq istəyirik. Yığmamıza gəlincə, bu komandanı yaxşı tanıyıram. Perspektivli komandadı. Yaxın gələcəkdə bu komandanın bir qrup üzvü əsas millimizə keçəcək. Ümid edirəm ki, U-21-in İngiltərə ilə ev oyunu da uğurlu alınacaq”.
Sadıqov əsas yığmamızın oyunlarına görə Premyer Liqada yaranan fasilənin onlar üçün münasib olmadığını etiraf edib: “Bu fasilə bizim üçün münasib deyil. Çünki komandamız yaxşı sürət yığmışdı. Xal və xallar qazanmağa davam etmək lazım idi. Amma bu, yığmanın oyunlarına görədi və burda başqa nəsə edə bilmərik”.
Təcrübəli mütəxəssis mövsümün startından tam razı qaldığını deyir: “Öncədən komandanın qarşısına 3 oyuna 9 xal toplamaq hədəfi qoyulmuşdu. Amma hazırda liderlər qrupundakı vəziyyəti nəzərə alsaq, bizim 7 xal qazanmağımız da pis göstərici deyil. Özü də biz hələ favoritlərdən biri ilə oyunumuzu keçirməmişik. İstənilən komanda ilə mübarizə aparmağa hazırıq. Öz yetirmələrimə güvənirəm. Biz gücümüzü qarşıdakı oyunlarda da göstərəcəyik”.
Sadıqov “Neftçi”nin uğuruna da toxunub: “İstənilən azərbaycanlı kimi, “Neftçi”nin Avropa Liqasındakı tarixi zəfəri məni də qürurlandırdı. Özü də bunu ilk dəfə məhz futbolumuzun flaqmanı həyata keçirdi. Komandanın mövsümün əvvəlində qarşısına qoyduğu hədəf qət olunub. Amma bununla kifayətlənmək olmaz. Güclü rəqiblərlə bir qrupa düşsə də, “Neftçi”nin belə klublara da dişini göstərməsinin zamanı yetişib”.
Millimizin sabiq çalışdırıcısı “Neftçi”nin bu uğurunun yığma komandamızın qarşıdakı oyunlarına da təsirsiz ötüşməyəcəyini düşünür: “Neftçi”nin bu tarixi uğuru yığmamızın üzvlərinə də müsbət tərəfdən təsirini göstərməlidi. Fikrimcə, biz yaxşı oyun və müsbət nəticə görəcəyik. İsraili öz meydanımızda məğlub edə bilərik. Amma Portuqaliya ilə çətin olacaq. Onlar qrupun favoritidi. Heyətlərində çoxlu gənc futbolçuları var. Məhz bu komandaya vaxtilə böyük hesabla da uduzmuşuq. Eyni zamanda unutmamalıyıq ki, vaxtilə onlardan xal da almışıq. Meydan düz, top yumrudu. Oynamaq lazımdı”.
