6 sentyabr 2012 00:43
Bakının stadionu hazır olmaq üzrədi (VİDEO)
Elan olunduğu kimi, "Bakı" ötən ilin son günlərində misli-bərabəri olmayan layihəyə start verib. Azerisport.az xəbər verir ki, özündə bir çox idman növlərini birləşdirən İdman klubuna çevrilən "Bakı" klub infrastrukturunun təkmilləşdirilməsi sahəsində Azərbaycan idmansevərlərinin üzünü güldürəcək möhtəşəm bir fəaliyyəti yekunlaşdırmaq üzrədi.
"Bakı" idman klubunun prezidenti Hafiz Məmmədovun sərəncamına əsasən hazırlanan inkişaf proqramına uyğun olaraq klub bazasının inşasının ikinci mərhələsinə qədəm qoyulub. 2011-ci ildən etibarən idmançıların ixtiyarına verilən təlim-məşq bazasının davamı olaraq yeni idman kompleksləri və futbol sahələrinin tikintisini nəzərdə tutan proqramın icrası başa çatmaqdadı.
Qısa bir müddətdə tamamlanacaq proqram daxilində təbii örtüklü 4 yenu futbol sahəsi, idmançılar üçün 120 nəfərlik mehmanxana, 3000 azarkeş tutumuna malik dünya standardlarına cavab verən universal qapaılı idman zalının inşası tam sürətlə davam edir. Bu arenada istənilən səviyyəli beynəlxalq yarışlar təşkil etmək mümkün olacaq.
Layihə çərçivəsində futbol arenasının yenidən qurulması, təxminən, 3000 azarkeş qəbul edəcək müasir futbol stadionuna çevriləcəyi gün də üzaqda deyil. Haqqında söhbət gedən nəhəng infrastruktur çalışmalarının bir neçə həftə ərzində başa çatması planlaşdırılır.
Nəzərə alsaq ki, FİFA qadınlardan ibarət U-17 Dünya çempionatının iştirakçıları klub bazasında məşq edərək həlledici oyunlara, məhz, burada hazırlaşacaqlar, görülən işlərin əhəmiyyəti birə-iki artmış olur. Bu işlər xüsusi keyfiyyət və dəqiqliklə və zamanında aparılır. Artıq təbii örtüklü meydanlar Dünya Çempionatının iştirakçılarının yolunu gözləyir. Digər sahələrdə isə işlər tam intensivliyi ilə davam edir.
