6 sentyabr 2012 15:36
“Səfərdə oynayan Azərbaycan yığması ilə evdəki arasında böyük fərq var”
Futbol üzrə İngiltərənin gənclərdən ibarət yığmasının baş məşqçisi Stüart Pirs AÇ-2013-ün seçmə mərhələsi çərçivəsində Azərbaycana qarşı keçirəcəkləri oyun öncəsi fikirlərini açıqlayıb. Azerisport.az xəbər verir ki, o, öncə bunları dilə gətirib:
“Biz qrupun qalibi olmaq istəyirik. Əks halda oktyabrda pley-off oyunlarında şansımızı sınamaq məcburiyyətində qalacağıq. Bu isə bizim planlarımıza qətiyyən uyğun gəlmir. Ona görə də Bakıda qələbə qazanmaq lazımdı”.
Pirsin sözlərinə görə, Azərbaycan daha çox ev komandasıdı: “Belə komandalar adətən səfər görüşləri ilə müqayisədə evdə daha yaxşı oyun sərgiləyirlər. Hətta deyərdim ki, səfərdə və evdə oynayan komandalar arasında çox böyük fərq olur. Həm də Azərbaycan yığması son dövrlər çox artırıb. Bunda da məşqçilər korpusunun xidməti danılmazdı”.
Baş məşqçi Bernard Lippertin fəaliyyətinə də geniş toxunan britaniyalı mütəxəssis daha sonra bunları dilə gətirib: “Avropa çempionatının final mərhələsinə birbaşa vəsiqə qazanmaq istəyiriksə, qarşıdakı hər iki oyunda qələbə qazanmalıyıq. Amma bu, heç də asan olmayacaq”.
Qeyd edək ki, Azərbaycan – İngiltərə oyunu bu gün Mərdəkandakı “Dalğa Arena”da keçiriləcək. Hansı ki, matçın süni örtüklü meydanda oynanılması Pirsin o qədər də ürəyincə deyil. Qarşılaşma saat 20:00-da başlayacaq.
