6 sentyabr 2012 12:41
Mahir Şükürov: Neftçinin futbolçuları yığmaya kömək edə bilərdi
Futbol üzrə Azərbaycan yığmasının müdafiəçisi Mahir Şükürov DÇ-2014-ün seçmə mərhələsi çərçivəsində İsrailə qarşı keçirəcəkləri oyun ərəfəsində fikirlərini açıqlayıb. Azerisport.az xəbər verir ki, o, öncə bunları dilə gətirib:
“Çətin oyun olacaq. Amma biz öz azarkeşlərimiz qarşısında oynayırıq. Buna görə də qələbə qazanmalıyıq. Qələbə qazanmaq üçün əlimizdən gələni edəcəyik. Əgər İsraili məğlub edə bilsək, Portuqaliyaya da yaxşı əhval-ruhiyyədə yollanacağıq”.
“Mənə qarşı Yossi Benayun oynayacaq. Buna baxmayaraq, oyuna maksimum köklənməyə çalışıram. Özümü yaxşı tərəfdən göstərmək istəyirəm. Ümid edirəm ki, Belçika və Qazaxıstanla oyunlarda olduğu kimi, yenə qol ötürməsi verə biləcəyəm” – deyə Mahir qeyd edib.
Şükürov “Neftçi”nin uğurunun faydasından da danışıb: “Çalışacağam ki, “Neftçi”də nə qədər faydalı idimsə, millidə də elə oynayım. Fikrimcə, “Neftçi”də məndən başqa Mirhüseyn Seyidov, Araz Abdullayev və Cavid İmamverdiyev də yığmaya kömək edə bilərdilər. Məsələn elə İsraillə oyunda. Rəşad Sadiqov barədə isə danışmağa dəyməz. Əlbəttə, o da yığmaya çox kömək edə bilərdi. Amma Berti Foqtsa bunu mən deyə bilmərəm. Bu, onun öz qərarıdı. Hər halda bu komanda APOEL kimi rəqibi məğlub edibsə, deməli, onun üzvləri də yığmaya kömək edə bilərdi”.
