7 sentyabr 2012 00:56
Xəzər Lənkəran – Kəpəz matçında 6 qol
“Xəzər Lənkəran”la “Kəpəz” yoldaşlıq oyunu keçirib. Azerisport.az xəbər verir ki, “AZAL Arena”da baş tutan oyun “Xəzər Lənkəran”ın 4:2 hesablı qələbəsi ilə başa çatıb.
Fəal keçən oyunda tərəflər qarşılıqlı olaraq qapılar qarşısında bir neçə təhlükəli epizodlar yarada biliblər. Oyunda hesabı isə 15-ci dəqiqədə cənubluların yeni transferi Beto açıb. Skarlatake dəqiq ötürmə ilə braziliyalını rəqib qapıçısı ilə üzbəüz çıxarıb və o, bu şansı boşa verməyib – 1:0. Bundan dərhal sonra isə “Kəpəz” irəli atılaraq hesabı bərabərləşdirməyə yaxın olub. Ancaq Todorov son anda topu boş qapıdan çıxara bilib. Hesab isə 30-cu dəqiqədə bərabərləşib. Sürətli əks-hücum zamanı Bəxtiyar Soltanov cərimə meydançasına daxil olaraq, topu saxlamadan qapıya yönəldib – 1:1.
40-cı dəqiqədə Sialmasın ötürməsindən sonra Beto təxminən 20 metrlik məsafədən “Kəpəz”in qapısını düzgün nişan alıb. Beləcə, ilk hissə “ağ-yaşıllar”ın xeyrinə bitib.
İkinci hissədə meydana yeni çıxan Kazım Kazımlı 52-ci dəqiqədə fərqi bir qədər artırıb. Amma 60-cı dəqiqədə “Kəpəz” qapıçının səhvindən yararlanaraq hesab fərqini minimuma endirib. Buna baxmayaraq, Orxan bir neçə dəqiqədən sonra öz səhvini artıqlaması ilə yuya bilib. Belə ki, “Kəpəz”in təşkil etdiyi hücum zamanı gənc qapıçı topu uzaqlaşdıraraq kobudluğa yol verib və rəqib hücumçunu yerə yıxıb. Bunun nəticəsində hakim penalti təyin edib. Ancaq Orxan fantastik sıçrayışla bu zərbəni dəf edə bilib.
63-cü dəqiqədə XL yenidən hücuma atılıb və Beto gözəl texnikası hesabına rəqib qapısına yaxınlaşaraq topu Sialmasa ötürüb. Sonuncu da öz növbəsində oyunun yekun nəticəsini müəyyənləşdirib – 4:2.
