8 sentyabr 2012 17:48
“Azərbaycan çempionatının bombardiri olmaq istəyirəm”
Azerisport.az sizi “İnter”in yeni transferi Djako Arafatın müsahibəsi ilə tanış edir.
- İlk öncə karyeran barədə məlumat verməyini istərdik.
- Futbolçu karyerama Toqoda başlamışam. Daha sonra Qananın “Aşanti Qold” klubunda çıxış etmişəm. Bundan sonra da İsrail klublarında oynamışam. İsraili tərk edəndən sonra Rusiyanın “Anji” klubuna keçdim. Lakin orada oynamaq şansı qazanmadığımdan xahiş etdim ki, məni icarəyə versinlər. İcarə əsasında Türkiyənin “Qaziantepspor” və Qətərin “Əl-Ərəbi” klublarında oynadım. Mövsüm başa çatandan sonra “Anji”yə qayıtdım. Lakin artıq mənim mövqeyimə bir neçə futbolçu gəlmişdi və biz klubla müqaviləni ləğv etdik. Daha sonra menecerim Azərbaycan variantının olduğunu bildirdi və mən bu təklifə müsbət cavab verdim. Artıq komandaya qoşulmuşam, məşqlərdə ihtirak edirəm. “İnter” yaxşı komandadı. Yeni klubuma xeyir vermək istəyirəm. Çox istərdim ki, “İnter” Azərbaycan çempionu olsun və mən komandaya bu yolda xeyir verim.
- “İnter”ə keçməzdən əvvəl Azərbaycan və Azərbaycan futbolu haqqında məlumatın var idi?
- Azərbaycan haqqında məlumatım az olsa da, bilirdim ki, həmyerlim Dare Nibombe “Bakı” klubunda çıxış edib. Ölkəniz haqqında məlumatım az olsa da, içimdəki hiss bura gəlməyimi istədi və mən artıq burdayam.
- Yeni komandanda ab-hava necədi?
- Komandada müsbət ab-hava hökm sürür. Bizim yaxşı baş məşqçimiz var. Komanda yoldaşlarım çox mehribandı. Hamı bir-biri ilə dost-qardaş kimidi. Artıq mənə də belə baxırlar.
- “İnter”dəki karyerandan nə gözləyirsən?
- İstərdim ki, “İnter” daha güclü olsun və mən də bu komandaya lazımlı futbolçu olum. Bombardir olmaq və vurduğum qollarla komandanın işinə yaramaq istəyirəm. (klub saytı)
