9 sentyabr 2012 13:20
Xəzər Lənkəranın prezidenti fəxri konsul oldu (FOTO)
Sentyabrın 8-də Azərbaycanın Lənkəran şəhərində Türkiyə Respublikasının Fəxri Konsulluğu fəaliyyətə başlayıb. Azerisport.az xəbər verir ki, bu münasibətlə keçirilən mərasimdə yerli hökumət strukturları ilə yanaşı, Azərbaycan və Türkiyənin diplomatik nümayəndəliklərinin əməkdaşları iştirak ediblər.
Mərasimdə Türkiyənin Azərbaycandakı səfiri Hulusi Kılıç, Qafqaz Müsəlmanları İdarəsinin rəisi, Şeyxülislam Hacı Allahşükür Paşazadə, Türkiyə Böyük Millət Məclisinin üzvləri Ahmet Arslan və Adnan Yılmaz da çıxış edərək, Azərbaycan-Türkiyə münasibətlərinin sarsılmaz olduğunu, iki dövlət arasında yaranmış qardaşlıq və dostluğun möhkəm təməl üzərində qurulduğunu bildiriblər. Açılışı bildirən rəmzi qırmızı lent kəsildikdən sonra iştirakçılar Fəxri Konsulluğun yerləşdiyi binada yaradılmış şəraitlə tanış olublar.
Türkiyənin Lənkərandakı fəxri konsulu Mais Mənsimov jurnalistlərə müsahibəsində iki qardaş ölkə arasında münasibətlərin daha da inkişafı, cənub bölgəsinin 7 rayonu üzrə konsulluq xidmətlərinin operativ və keyfiyyətli görülməsi üçün əlindən gələni əsirgəməyəcəyini bildirib.
