UEFA çempionumuza texniki məğlubiyyət verdi

Xəbər verdiyimiz kimi, Azərbaycan çempionu “Araz” UEFA Kubokunun əsas mərhələsindəki çıxışını başa vurub. Azerisport.az xəbər verir ki, komandamız İrlandiyanın İED klubunu 2:1, Hollandiyanın “Eyndhoven” komandasını 4:3 hesabıyla məğlub etmiş, Macarıstanın “Dyor” klubu ilə sülh bağlamışdı – 5:5.

Lakin qrupun oyunları başa çatdıqdan sonra UEFA “Araz”a İED-lə oyunda texniki məğlubiyyət verib – 0:5. Buna paytaxt klubunun yeni qapıçısı Covanni Buranellonun sənədlərinin qaydasında olmaması səbəb olub.

 

“Araz” rəhbərliyi bu barədə yalnız son turda keçirilən “Dyor”la qarşılaşmada xəbər tutub. Bu üzdən də hətta hesabda 1:4 geridə olmasına rəğmən sonradan 5:4 önə keçən komandamız sonda “Dyor”la heç-heçəyə razılamışdı.

 

Texniki məğlubiyyətin verilməsi nə qədər üzücü hal olsa da, ən sevindirici məqam komandamızın qrupda yenə ikinci pillədəki yerini qorumasıdı. Belə ki, “Araz” elit raundda mübarizəni davam etdirə biləcək.