11 sentyabr 2012 15:35
Fan Zona əyləncəsi start götürür
Bu il 22 sentyabr - 13 oktyabr tarixlərində ölkəmizdə keçiriləcək FIFA U-17 qadınlararsı dünya çempionatının ən əyləncəli hissəsi olan Fan Zona Dənizkənarı Parkda quraşdırılmağa başlayıb. Azerisport.az xəbər verir ki, Fan Zonada çempionatın milli dəstəkçiləri SOCAR, Bakcell, Xalq Bank və Paşa Sığorta, eləcə də VISA, Hyundai, Coca Cola kimi FIFA partnyorlarının da stendləri daxil olmaqla 12 stend və müxtəlif attraksionlar quraşdırılacaq.
Fan Zonanın əsas məqsədi yalnız stadionlarda deyil, həmçinin şəhər mərkəzində də futbol atmosferi yaratmaq, çempionat ab-havasını şəhər əhalisinə hiss etdirməkdir. 3000 m2 sahədə quraşdırılacaq Fan Zona Dövlət Kukla Teatrının arxa hissəsindən başlayan böyük bir sahəni əhatə edəcək. Girişi pulsuz olacaq Fan Zonada azarkeşlər attraksionlardan istifadə edə və çoxlu pulsuz hədiyyələr qazana, həmçinin hər axşam təşkil olunacaq lotoreyaya qoşula və əylənə bilərlər. Çempionat həyəcanını yaşamaq istəyən hər kəsin stendlərdən həmin günün konsert proqramı ilə bağlı məlumat almaq imkanı da olacaq. 15 sentyabr tarixində açılacaq və çempionatın final gününə qədər davam edəcək böyük əyləncə bazarında müxtəlif suvenirlərin, çempionatı simvolizə edən kiçik əşyaların satışı da təşkil olunacaq. Burada həmçinin başı əyləncəyə qarışıb yeməyi unudan əyləncəsevərlər üçün yemək satışı, çempionat həyəcanından təsirlənib oyunu seyr etmək istəyənlər üçün bilet satışı da təşkil olunacaq.
Qalibiyyət üçün 32 oyun, 90 dəqiqə mübarizə aparacaq 16 komandanı dəstəkləmək, sevdiyiniz ölkəyə azarkeşlik etmək və ya ümumilikdə futbol eşqini üzərinizdə daşımaq, simanıza həkk etmək üçün “face painting” (üz rənglənməsi) nöqtəsi də sizlərə təqdim ediləcək.
Qeyd edək ki, 29 gün davam edəcək Fan Zona əyləncəsi müddətində yerli və xarici müğənnilərin iştirakı ilə möhtəşəm konsert proqramları təşkil olunacaq.
