12 sentyabr 2012 13:55
AFFA baş məşqçini bir oyunluq cəzalandırdı
AFFA İntizam Komitəsinin növbəti iclası keçirilib. Azerisport.az xəbər verir ki, iclasda aşağıdakı qərarlar qəbul edilib:
Azərbaycan birinci divizionunun 1-ci turunun “Göyəzən” – “Şuşa” matçının 71-ci dəqiqəsində “Göyəzən”in baş məşqçisi Elxan Muradov hakimə etiraz etdiyinə görə texniki zonadan kənarlaşdırıldığı üçün 1 oyunluq cəzalanıb, klubu 100 manat cərimə olunub. Oyunun 88-ci dəqiqəsində “Şuşa”nın futbolçusu Elçin Qasımov azarkeşlərə qarşı təhqiredici sözlər işlətdiyinə görə 3 oyunluq cəzalanıb, klubu 200 manat cərimə olunub. Matçın 89-cu dəqiqəsində “Göyəzən”in azarkeşləri tərəfindən meydançaya kənar əşya atıldığı üçün klub 200 manat cərimə olunub.
“Ağsu” – “Şahdağ” matçının 79-cu dəqiqəsində “Ağsu”nun futbolçusu Ramil Əliyev kobud oyuna görə birbaşa qırmızı vərəqə alaraq meydandan kənarlaşdırldığı üçün 2 oyunluq cəzalanıb, klubu 200 manat cərimə olunub.
