14 sentyabr 2012 18:15
Premyer Liqa, 5-ci tur: Oqtay Abdullayevin proqnozu
Azərbaycan futbolunun veteranı Oqtay Abdullayev azerisport.az saytına müsahibəsində Premyer Liqamızın 5-ci turunun oyunları ilə bağlı proqnozlarını açıqlayıb.
Bakı – Turan
“Bakı” mövsümə yaxşı başlamayıb. Onlar son matçlarda da inamlı təsir bağışlamadılar. Amma bu dəfə şanslarını əldən verəcəklərini düşünmürəm. Maliyyə problemləri “Turan”a hələ də öz təsirini göstərir. Oyun planında da bakılılar tovuzlulardan daha güclüdülər. Ona görə də “Bakı”nın qalib gələcəyini düşünürəm.
Kəpəz – Qəbələ
“Kəpəz”də baş məşqçi postuna yenicə Mahmud Qurbanov təyin olunub. Əminəm ki, onunla gəncəlilər istədiklərinə nail ola biləcəklər. Amma bu komanda hələ öz oyununu tapa bilməyib. Kollektiv hələ tam formalaşmayıb. Buna görə də hesab edirəm ki, “Qəbələ” səfərdə qələbə qazanacaq.
İnter – Sumqayıt
“İnter” təcrübəli komandadı. “Sumqayıt” isə gənclərdən və perspektivli uşaqlardan qurulmuş kollektivdi. Baxmayaraq ki, sumqayıtlılar mövsümə yaxşı başlamışdılar, son görüşlərində böyük hesablı məğlubiyyətlərlə üzləşirlər. “Bankirlər”lə görüşlərdə də uğur qazanacaqları inandırıcı görünmür. “İnter” qalib gələcək.
Rəvan – Simurq
Bu oyunun nəticəsini proqnozlaşdırmaq çətindi. Zaqatala təmsilçisi startda yaxşı təsir bağışlamaqdadı. “Rəvan” da pis deyil. Sonda heç-heçə gözləyirəm.
Neftçi – Xəzər Lənkəran
Bu komandaların oyunu həmişə çətin keçir. Hər iki komandanın çılğın azarkeşləri var. Hansı ki, belə oyunlarda sona kimi komandalarını dəstəkləyirlər. “Neftçi” avrokuboklarda yaxşı çıxış edir, qrup mərhələsinə vəsiqə qazanıb. “Xəzər Lənkəran” isə Premyer Liqada növbəti qələbəsini qazanmağa çalışacaq. Amma görüşün “Neftçi”nin minimal hesablı qələbəsi ilə başa çatacağını düşünürəm.
AZAL – Qarabağ
Həm AZAL, həm də “Qarabağ” güclü komandadı. Hər ikisi çıxışdadı. Kimin üç xal qazanacağını demək çətindi. Ona görə də heç-heçəyə üstünlük verirəm.
