17 sentyabr 2012 00:00
Türkiyədə Azərbaycan derbisi: Rail sevindi, Cavid üzüldü (YENİLƏNİB)
Bu gün futbol üzrə Türkiyə PTT Liqasında 3-cü turun oyunları keçirilib. Azerisport.az xəbər verir ki, bu turda qardaş ölkə çempionatında çıxış edən iki futbolçumuzun komandaları üz-üzə gəlib.
Belə ki, Cavid Hüseynovun şərəfini qoruduğu “Adana Demirspor” səfərdə Rail Məlikovlu “Denizlispor”un qonağı olub. Qeyd edək ki, bu oyuna qədər Rail hələ yeni klubunda debüt edə bilməmişdi. Amma Cavid komandasının əvvəlki hər iki görüşündə meydana çıxmışdı. Elə onların klubları da fərqli nəticələr qazanmışdılar. “Adana Demirspor” hər iki görüşdə heç-heçəyə razılaşdığı halda, “Denizlispor” bir oyunda uduzub, digərində qalib gəlmişdi.
Futbolçularımızın komandalarının öz aralarındakı görüşündə isə "Denizlispor" qalib gəlib. Sevindirici məqamdı ki, bu oyunda hər iki futbolçumuz ilk dəqiqələrdən mübarizə aparmaq şansı qazanıblar. Qeyd edək ki, Rail 2, Cavid isə 25 nömrə altında çıxış edib. Özü də maraqlıdı ki, Cavid həmişəki kimi yarımmüdafiənin sağında oynasa da, Rail adət etdiyimiz müdafiənin sağ cinahında yox, mərkəzində yer alıb.
“Adana Demirspor” hazırda 2 xalla 18 komanda arasında 13-cü yerdədi. “Denizlispor” isə 6 xalla 5-cidi.
Türkiyə PTT birinci liqası
3-cü tur
16 sentyabr
Denizlispor - Adana Demirspor - 2:0 (1:0)
Qollar: Y.Arslan, 7, C.Erdem, 61.
Oyun başladı
Standart vəziyyət zamanı meydan sahibləri hesabı açırlar - 1:0
32-ci dəqiqədə Cavid hesabı bərabərləşdirməyə yaxın olsa da, zərbəsini qapıçı tutur
Qeyd edək ki, baş məşqçisi Raili müdafiənin cinahında yox, mərkəzində oynadır
Məlikovun komandası 61-ci dəqiqədə gözəl qola sevinir
Matçın 72-ci dəqiqəsində Cavidi komanda yoldaşı Erçağ Evirgen əvəzləyir
Matç başa çatdı
