16 sentyabr 2012 21:15
Qurban Qurbanov: İstefam ilə bağlı rəhbərliklə danışacağam
“Qarabağ”ın baş məşqçisi Qurban Qurbanov Premyer Liqanın 5-ci turunun AZAL-la oyununu şərh edib. Azerisport.az xəbər verir ki, Ağdam təmsilçisinin çalışdırıcısı 2:6 hesabıyla başa çatan görüşdən sonra bunları dilə gətirib:
"AZAL-ı təbrik edirəm. Vaqif müəllim gözəl komanda hazırlaya bilib. Həqiqətən də liderliyə yaraşan komandadır. Bu gün meydançada bir komanda oynayırdı. Bu oyun mənə çox ağır gəldi. Mənə ağır zərbə oldu. Nildo çox gözəl hücumçudur. Komandadan getmək barədə rəhbərliklə danışacağam. Rəhbərlik mənə çox güvənir. Amma komandada bir dəyişiklik etmək lazımdır. Gələcəyin komandasını formalaşdırmaq istəyirik. Hazırki futbolçularla bağlı problemlərimiz var. Rəhbərliklə bu barədə danışacağam. Azarkeşlərimizə təşəkkür edirəm ki, nəticəyə baxmayaraq sona qədər dəstək oldular".
