16 sentyabr 2012 00:25
Partizanın məşqçisi: Neftçinin zəif cəhətlərini də gördüm
Serbiyanın “Partizan” klubunun baş məşqçisinin köməkçisi Aleksandr Roqiç Avropa Liqasında eyni qrupda yer aldıqları Azərbaycan çempionu “Neftçi”nin Premyer Liqamızın 5-ci turundakı “Xəzər Lənkəran”la ev oyununu (2:1) canlı izləyib. Serbiyalı mütəxəssis qarşılaşmadan sonra azerisport.az saytına müsahibə verib.
“Oyuna qədər mən şəhərinizi gəzdim. Çox müasir şəhərdi, gözəl binalar var. Belqradda daha çox köhnə binaları görə bilərsiz. Bütövlükdə, bura xoşuma gəldi. Hələ Tofiq Bəhramov adına Respublika stadionunda olmamışam. Amma mütləq ora da baş çəkəcəyəm. Axı biz orda oynayacağıq” – deyə, Roqiç sözə başlayıb.
“Partizan”ın çalışdırıcısı həmçinin Serbiya və Azərbaycan derbilərini müqayisə edib: “Bura gələndə bilirdim ki, bu, Premyer Liqanın vacib oyunudu. Əgər “Partizan”la “Crvena Zvezda” arasındakı derbi ilə bu görüşü müqayisə etsək, deyə bilərəm ki, coşqu eynidi. Amma bizdə oyun ətrafında baş verənləri sözlə ifadə etmək olmur. Burda bir qədər fərqlidi. Eyni zamanda azarkeş marağı da çox böyük olur. Yəqin ki, bu kimi fərqləri Saşa Stamenkoviç də deyə bilər”.
Serbiyalı mütəxəssis oyundan da danışıb: “Oyunla bağlı bəzi qeydlər apardım. Düşünmürəm ki, rəqibimiz bizdən nəyisə gizlətməyə çalışdı. Çünki onlar üçün “Xəzər Lənkəran”la da oyun prinsipial idi. Həm də Böyükağa Hacıyev bu oyuna əsas heyəti buraxmışdı. Rəqibimizə hörmətlə yanaşırıq. “Neftçi”nin öz oyun üslubu var. Komandada anlaşma səviyyəsi çox yaxşıdı. Amma biz də zəif deyilik. Bizim də öz güclü tərəflərimiz var. Bunlardan yararlanmağa çalışacağıq. Rəqibimizin bəzi çatışmazlıqları da var. Amma bu barədə mətbuata açıqlama verməyəcəyəm. Onları baş məşqçimizə deyəcəyəm”.
Roqiç “Partizan”ın əsas üstünlüyü kimi təcrübəsinin daha çox olmasını qeyd edir: “Neftçi”nin belə yüksək səviyyəli turnirlərdə iştirak təcrübəsi azdı. Bizdə isə tam əksinədi. Lakin hər şeyə rəğmən şansları bərabər hesab edirəm. Biz ilk oyunda qələbə qazanmaq istəyirik”.
