19 sentyabr 2012 19:55
“Şübhəli oyunlarla bağlı məlumatların qarşılıqlı ötürülməsi ilə bağlı razılığımız var”
Xəbər verdiyimiz kimi, bu gün Peşəkar Futbol Liqası və "Topaz" arasında strateji əməkdaşlıq haqqında müqavilənin imzalanması ilə əlaqədar konfrans keçirilib. Azerisport.az xəbər verir ki, mərasimdə “Azərinteltek” şirkətinin Direktorlar Şurasının sərdi Ahmet Geylani Sezer Peşəkar Futbol Liqası və “Topaz” arasındakı əməkdaşlıq haqqında fikirlərini və diləklərini bildirib:
“Bu gün uzun zamandır üzərində çalışdığımız bir layihəyə başlayırıq. Bizim hədəfimiz Azərbaycanda idmanın inkişafına nail olmaqdır. Futbolun inkişafı da bizim üçün çox önəmlidir. Bu anlaşmanın bugünkü səviyyəyə gəlməsinə görə Ramin müəllim və Azər müəllimə təşəkkürümü bildirirəm. Çünki, hamı bu işə daha da yaxşı alınması düşüncəsi ilə yanaşıblar. Bizim hədəfimiz gələcək üç il ərzində Azərbaycan futbolunun inkişafında, az da olsa, əməyimizin olmasıdır. Bu müqavilənin Azərbaycan futbolu üçün uğurlu olacağına inanıram”.
“Bu gün imzalanan müqavilə ilə Azərbaycan Premyer Liqasının titul sponsoru olduq. Bu işlə bizim reklam büdcəmiz tamamilə ayrıdır. Buraya ayrılan pul reklam büdcəsindən ayrılan pul deyil. Sponsorluğa görə verilən pul futbolun inkişafı üçün öz hissəmizə düşən gəlirdən verilir. Liqaya sponsor olmağın təbii ki, bəzi məsuliyyətlətləri də var. Sadəcə adı alıb bunun reklamı ilə kifayətlənməyi düşünmürük. Liqanın inkişafı üçün planlaşdırdığımız çalışmalar var. “Ayın futbolçusu” kimi, KİV nümayəndələri üçün müəyyən yarışların təşkil edilməsi kimi planlarımız var. Keçən il üçlü bir razılaşma əldə olunub. AFFA, Gənclər və İdman Nazirliyi və “Azərinteltek” arasında şübhəli oyunlarla əlaqədar məlumatların qarşılıqlı olaraq ötürülməsi ilə bağlı razılığımız var. Buna bənzər bir anlaşma da Türkiyə Futbol Federasiyası ilə əldə etmişik. Avropada iki futbol federasiyası ilə anlaşma əldə edən tək şirkətik. Bizim hədəfimiz etik məsələlərdə də dövlətimizlə əməkdaşlıq etməkdir”.
