21 sentyabr 2012 17:07
Tahir Süleymanov: Neftçi Belqradda baş verənlərlə bağlı UEFA-ya məlumat verəcək
Azərbaycan çempionu “Neftçi”nin vitse-prezidenti Tahir Süleymanov Avropa Liqasının qrup mərhələsi çərçivəsində Serbiya “Partizan”ı ilə qarşılaşmadan (0:0) sonra baş verənlərə münasibətini açıqlayıb. Azerisport.az saytına müsahibəsində o, qapıçı Saşa Stamenkoviçə qarşı müxtəlif təzyiq və təhqirlərə görə UEFA-ya şikayət edəcəklərini bəyan edib.
“Biz Bakıya yenicə qayıtmışıq. Amma tezliklə UEFA-ya müraciət edəcəyik. Qitə futbol qurumu təkcə “Partizan” azarkeşlərinin yox, həm də serbiyalı futbolçularından davranışına layiqli qiymət verməlidi. Hələ “Partizan”la oyundan öncə rəqib futbolçulardan ikisi Saşaya yaxınlaşaraq, ona nalayiq sözlər dedilər. Biz buna mane olduq və matçın UEFA nümayəndəsinə müraciət etdik ki, belə halların qarşısı alınsın. O isə öz növbəsində Serbiya klubunun rəsmilərinə irad bildirdi. Azarkeşlərin açdığı bannerə gəlincə, bu barədə çox danışmaq istəmirəm. Onsuz da onu hamı gördü. Həmçinin rəqib futbolçuların oyundan dərhal sonra Stamenkoviçə necə hücum çəkdiyinin də şahidi oldunuz. Bütün bunlar barədə UEFA-ya məlumat verəcəyik”.
“Neftçi” rəsmisi UEFA-nın Belqradda baş verənlərə layiqli qiymət verəcəyinə inanır: “Əminəm ki, UEFA bu işə baxacaq. Qərar barədə heç nə deyə bilmərəm. Amma onu bilirəm ki, bu, nəticəyə təsir göstərməyəcək. Çünki hər şey final fitindən sonra baş verdi, oyun yarıda dayanmadı. Oyun zamanı da heç bir təhlükə yox idi. Ona görə də texniki məğlubiyyətdən söhbət gedə bilməz”.
