21 sentyabr 2012 11:58
Saşa Stamenkoviç: Başa düşə bilmirəm ki, o, niyə mənimlə salamlaşmaqdan imtina etdi
Azərbaycan çempionu “Neftçi”nin qapıçısı Saşa Stamenkoviç Avropa Liqasının qrup mərhələsi çərçivəsində Serbiya “Partizan”ına qarşı keçirilən oyundan (0:0) sonra fikirlərini açıqlayıb. Azerisport.az saytına müsahibəsində o, öncə bunları dilə gətirib:
“Oyunun nəticəsini ədalətli hesab edirəm. Belqraddan bir xal aparmaq pis nəticə deyil”.
Stamenkoviç qarşılaşmadan sonra həmyerlilərinin onu döymək istəməsinə də toxunub: “Təbii ki, oyundan sonra belə hadisələrin baş verməsi heç də xoş deyil. Qarşılaşma bitən kimi Aleksandr Mitroviç mənə yaxınlaşıb xoşagəlməz sözlər söyləməyə, təxribata çəkməyə başladı. Ona özünü yaxşı aparmağı öyrənmək lazımdı. Məsələn, Milan Smilyaniçlə Saşa Markoviç gənc olsa da, özlərini ondan on dəfə yaxşı aparırlar. “Partizan”ın baş məşqçisi Vladimir Vermezoviçə minnətdaram ki, olaya vaxtında müdaxilə etdi və məni tunelə qədər qorudu. Düzünü deyim ki, Mitroviçin oyundan sonra özünü belə aparacağını gözləmirdim”.
O, rəqib həmkarı, “Partizan”ın qapıçısı Vladimir Stoykoviçin də davranışından narazı qalıb: “Başa düşə bilmirəm ki, o, niyə mənimlə salamlaşmaqdan imtina etdi. Axı vaxtilə biz onunla bir komandada çıxış etmişik. Hər ikimiz “Crvena Zvezda”nın formasını geyinmişik. İndi onun necə adam olduğu barədə danışılanlara inanmağa başlayıram”.
“Neftçi”nin qolkiperi meydan sahiblərinin azarkeşlərinin də hərəkətlərinə münasibətini açıqlayıb: “Əvvəla mən heç bu oyunda formamın altından “Crvena Zvezda”nın maykasını geyinməmişdim. Həm də stadionda o dərəcədə çox azarkeş yox idi ki, onların səsini eşidə bilim. Bəzi xuliqanlar tərəfindən təhqir olunmağıma gəlincə, mən onları azarkeş hesab etmirəm”.
