23 sentyabr 2012 00:51
Cavid oynadı, "fərqləndi", komandası uduzdu (YENİLƏNİB)
Bu gün futbol üzrə Azərbaycan yığmasının yarımmüdafiəçisi Cavid Hüseynovun çıxış etdiyi “Adana Demirspor” klubu Türkiyə PTT birinci liqasında növbəti matçına çıxıb. Azerisport.az xəbər verir ki, Adana təmsilçisi ölkə çempionatının 4-cü turu çərçivəsində “Konyaspor” ilə görüşüb.
Qarşılaşma doğma meydanda keçirilirdi. Bu üzdən də həmyerlimizin komandası görüşdən mütləq qalib ayrılmağı hədəfləmişdi. Hansı ki, geridə qalan görüşlərdə hələlik bu, onlara qismət olmamışdı. Amma onlar bu dəfə də istəklərinə çata bilməyiblər.
Əvvəlki oyunlarda start heyətdə meydana çıxan Cavidin bu dəfə də oynaması istisna deyildi. Gözlənildiyi kimi, baş məşqçi Osman Özdemir onu yenə ilk dəqiqələrdən meydana buraxıb. Amma 9 və 17-ci dəqiqələrdə iki qol buraxan meydan sahiblərinin çalışdırıcısı fasilədə birdən-birə iki dəyişikliyə əl atıb ki, meydanı tərk edənlərdən də biri Cavid olub. Həmyerlimiz meydanda olduğu dəqiqələrdə yalnız 9-cu dəqiqədə sarı vərəqə almaqla "fərqlənə" bilib.
Qeyd edək ki, “Adana Demirspor” hazırda 2 xalla 18 komanda arasında 14-cü yerdədi.
Türkiyə PTT birinci liqası
4-cü tur
22 sentyabr
Adana Demirspor - Konyaspor - 1:2
Qollar: İrfan Başaran, 47 - Erdal Kılıçaslan, 9, Neca, 17.
