Partizanın idman direktoru Neftçinin ittihamlarını cavablandırdı

Serbiyanın “Partizan” klubunun idman direktoru Lyubişa Tumbakoviç Avropa Liqasının qrup mərhələsi çərçivəsində Azərbaycan çempionu “Neftçi”yə qarşı keçirdikləri oyundan danışıb. Azerisport.az xəbər verir ki, o, öncə bunları dilə gətirib:

“Bəzi məqamlara görə mən heç-heçədən tam razıyam. Biz səliqəli oynadıq, çoxlu qol vəziyyətləri yaratdıq. Sadəcə, bunlardan istifadə edə bilmədik. “Neftçi” təəccübləndirməyi bacaran komandadı. Milan “İnter”i və Kazan “Rubin”indən geri qalsalar da, ciddi kollektivdi. Biz bunu rəqibi analiz edərkən də anlamışdıq. Onların heyətində kim, harda və necə oynamaq lazım olduğunu yaxşı bilirlər”.

 

“Partizan”ın rəsmisi oyundan sonra baş verən qalmaqala da toxunub. Saşa Stamenkoviçlə Vladimir Stoykoviç arasında baş verənlərdən danışarkən o, bunları söyləyib: “Mən Saşanın Vladimir haqda açıqlamalarını ədalətsiz hesab edirəm. Ümumiyyətlə, Stoykoviçdən söhbət gedəndə, ona hörmət etmək lazımdı. Düzdü, oyundan öncə və sonra təxribata çəkmə meylləri hiss olunurdu. Amma bütün bunlar idmanın bir hissəsidi. Oyundan sonra bəzi oyunçularımız çox emosional idilər. Əksəri gənclərdi. Bunu böyük səhv kimi qələmə vermək olmaz”.

 

Tumbakoviç qonaq komandanın bəzi məqamlara görə narazı qalmasına da münasibətini açıqlayıb: “Fikrimcə, biz onları qonaqpərvərliklə qarşıladıq. Hər şey fantastik idi. Onların baş məşqçisinin dediklərini başa düşə bilmirəm. Amma o, yaşlı inşandı və mümkündü ki, bir çox şeylərdən xəbəri yoxdu. Düzü heç onların baş məşqçisinin kim olduğunu da dəqiqləşdirə bilmədim. Orda bir gənc də var idi, qoca da”.