25 sentyabr 2012 01:02
İtaliya futbolunda qalmaqala səbəb olan oyunla bağlı yekun qərar verildi
Xəbər verdiyimiz kimi, futbol üzrə İtaliya A Seriyasında bir oyunla bağlı qalmaqal yaranıb. Azerisport.az xəbər verir ki, 4-cü tur çərçivəsində keçirilməli olan “Cagliari” – “Roma” görüşü baş tutmayıb.
Görüşün bazar günü Bakı vaxtı ilə saat 18:00-da Sardiniyada keçirilməsi planlaşdırılırdı. Paytaxtın eyniadlı təmsilçisi hətta bu qarşılaşmada iştirak etmək üçün oyundan bir gün öncə səfərə də yollanmışdı. Amma son anda Kalyari prefekturası bu qarşılaşmanın nəzərdə tutulan stadionda keçirilməsinə icazə verməyib. Buna isə “Cagliari” prezidentinin klubun rəsmi saytı vasitəsilə bütün azarkeşləri sözügedən oyuna dəvət etməsi səbəb olub. Halbuki, həmin arenada hazırda təmir işləri gedir və bu üzdən qarşılaşmanın azarkeşsiz keçirilməsi barədə rəsmi qərar çıxarılmışdı. Amma klub prezidentinin gözlənilməz açıqlaması sözügedən bölgə rəhbərliyinin də sərt qərar çıxarması ilə nəticələnib. Onlar azarkeşlərin stadiona buraxılmayacaqları təqdirdə çaxnaşma yaradacaqlarını nəzərə alaraq, ümumiyyətlə burda oyun keçirilməsinə imkan verməyiblər.
Səfərə də gedən, lakin belə gözlənilməz olaylarla üzləşən “Roma” rəhbərliyi isə dərhal baş verənlərə görə müvafiq qurumların hesabat verməsini tələb edirdi. Romalılar həmçinin “Cagliari”nin texniki məğlubiyyətlə cəzalandırılmasını da istəyirdilər. Çünki A Seriyasının nizamnaməsində də oxşar olaylarla bağlı belə bir qərarın çıxarılmasına dair bənd vardı. Sonda təşkilat komitəsi məhz belə bir qərar çıxarıb. “Cagliari” 0:3 hesablı texniki məğlubiyyətlə üzləşib. Beləcə, “Roma” oynamadan 3 xala sahib çıxıb.
