25 sentyabr 2012 17:51
Böyükağa Hacıyev: Oxşar hal bir daha təkrarlanmayacaq
“Oyunlarımızın qrafik sıxlığı özünü göstərir. Qrup mərhələsində “Partizan”la oyun sonrası yorğunluq və bəzi futbolçuların həddindən artıq özünə arxayınlığı, rəqibi qiymətləndirməməsi özünü göstərdi”. Azerisport.az xəbər verir ki, bu sözləri “Neftçi”nin baş məşqçisi Böyükağa Hacıyev deyib.
Baş məşqçi futbolçularının “Sumqayıt”a hörmətlə yanaşmadığına işarə vurub: “Futbolçular bir amili yaddan çıxarmamalıdı ki, kimliyindən asılı olmayaraq rəqibə hörmətlə yanaşmalıdılar. Əks təqdirdə onlar daha acı məğlubiyyətlərlə üzləşə bilərlər. Bunun da istər məşqçilər korpusuna, istərsə də futbolçulara ağır nəticələri olar”.
Hacıyev məsuliyyəti üzərinə götürüb: “Bu gün əgər Sadıq Sadıqovun klubdakı strategiyasını əsas tutaraq gənclərə əsas diqqət yetirilirsə, futbolçular, klub rəhbərliyinin və məşqçilər korpusunun etimadını doğrultmalıdı. Bir daha bildirirəm ki, məğlubiyyətə görə bütün məsuliyyəti öz üzərimə götürürəm və söz verirəm ki, oxşar hal bir daha təkrarlanmayacaq”.
