3 oktyabr 2012 14:08
Yığmamız FİFA reytinqində gerilədi
FİFA dünyanın futbol yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan yığması yeni açıqlanan siyahıda 4 pillə geriləyib.
Ötən ay 107-ci pillədə qərarlaşan Azərbaycan yığması FİFA-nın siyahısında 4 pillə geriliyərək 111-ci pilləyə enib. Hazırda millimizin aktivində 306 xal var.
DÇ-2014-ün seçmə mərhələsində yığmamızın rəqiblərindən olan komandalar arasında Lüksemburq və Şimali İrlandiyanı qabaqlayırıq. Bu komandalardan birincisi ötən ayla müqayisədə 36 pillə geriləyib (142-ci yer; 191 xal). İrlandiyalılar 12 pillə irəliləsələr də, 287 xalla 117-ci yerdə qərarlaşıblar. Bizdən öndə olanlar isə bunlardı – Portuqaliya (3; 1259), Rusiya (12; 1014), İsrail (82; 423). Ötən ayla müqayiəsə portəgizlər və ruslar 1 pillə irəliləyiblər. İsrail isə yeddi pillə geriləyib.
İlk onluğa gəlincə, İspaniya 1611 xalla zirvədəki yerini qoruyub. Almaniya da yerində sayıb və hazırda 1459 xalla ikinci yerdədi. Portuqaliya 1 pillə irəliləyib və hazırda 1259 xalla üçüncüdü. Argentina (1208 xalla dördüncü) yerində sayıb. İngiltərə (1196) geriləyib və indi beşincidi. Hollandiya iki pillə irəliləyib – 1141 xalla altıncı yer. Uruqvay 2 pillə geriləyərək, hazırda 1140 xalla yeddinci sırada qərarlaşıb. İtaliya ötən ayla müqayisədə iki pillə geriləyib – 1106 xalla səkkizinci sıra. Kolumbiya 13 pilləlik sıçrayışla doqquzuncu sıraya çıxıb – 1102 xal. İlk onluğu Yunanıstan qapayır – 1029 xal.
Növbəti reytinq siyahısı noyabrın 7-də açıqlanacaq.
