3 oktyabr 2012 15:18
Topaz Premyer Liqası, 8-ci tur: Vladislav Qədirovun proqnozu
“Rəvan”ın sabiq baş məşqçisi Vladislav Qədirov azerisport.az saytına müsahibəsində Topaz Premyer Liqasının 8-ci turunun oyunları ilə bağlı proqnozlarını açıqlayıb.
AZAL – Xəzər Lənkəran
Vaqif Sadıqovun komandası mövsümə çox yaxşı başlayıb. Mənə elə gəlir ki, onlar bu oyunda qələbə şansını qaçırmazlar. Düzdü, lənkəranlıların da durumu ancaq qələbə qazanmağı şərtləndirir. Amma mənə elə gəlir ki, bu oyunda AZAL qalib gələcək.
Kəpəz – Qarabağ
“Kəpəz” evdə oynadığı üçün işi bir qədər asan olacaq. “Qarabağ” üçün isə səfər oyunları o qədər də uğurlu sayıla bilməz. Qurban Qurbanovun komandası tədricən oyununu yaxşılaşdırır. Fikrimcə, Ağdam klubu qələbə qazanacaq.
Bakı – Qəbələ
Bojidar Bandoviç hələ komandadakı problemləri yoluna qoya bilməyib. Ramiz Məmmədov isə “Qəbələ”yə yenicə baş məşqçi təyin olunsa da, komandanı çox gözəl tanıyır. Bu görüşdə heç-heçə qeydə alınacağını düşünürəm.
Simurq – Sumqayıt
Hər iki komandanın yeni mövsümə uğurlu başladığını demək olar. Müəyyən mənada bu komandaların bir-birinə oxşarlığını da demək olar. Cinahlardan yaxşı istifadə edirlər, əks-hücum futboluna üstünlük verirlər. “Simurq” eyni zamanda əla müdafiəsi ilə seçilir. Hər halda Zaqatala klubu doğma meydanda qələbə şansını əldən buraxmaz.
Rəvan – İnter
Hər iki komandada əla ifaçılar var. Mənə elə gəlir ki, “İnter”ə heç də asan olmayacaq. Heç-heçə gözləyirəm.
Neftçi – Turan
“Turan” son turda “Xəzər Lənkəran” üzərindəki qələbə ilə sensasiyaya imza atdı. Amma eyni uğuru “Neftçi” ilə qarşılaşmada təkrarlamaq çətin olacaq. Fikrimcə, “neftçilər” qalib gələcək.
