4 oktyabr 2012 00:28
23-cü duelə doğru
Bu gün Topaz Premyer Liqasının 8-ci turu çərçivəsində “Qəbələ” səfərdə “Bakı” ilə görüşəcək. Azerisport.az xəbər verir ki, səfər oyunu komandalar arasında 23-cü duel olacaq.
İndiyə qədərki qarşılaşmaların balansında bakılılar öndə olsa da, son matçda bölgə komandası rəqibini 4 cavabsız qolla darmadağın edib. Ümumilikdə “Bakı” “Qəbələ” ilə ən çox görüşən rəqibdi. Bu da tərəflərin 3 dəfə Azərbaycan kubokunda duelə çıxmağı ilə bağlıdır. Həmin 3 duelə sığan 6 matç və 16 çempionat oyununda “Qəbələ” hələlik 3 dəfə qalib gəlib.
12-ci dəfə “Bakı”nın qonağı olacaq komanda ilk səfər qələbəsini qazanmaq əzmindədir. Hələ ki rəqibini onun meydanında yenməyən “Qəbələ” bu uğursuz seriyanı qıracağı halda səfərdə 3-cü dəfə rəqibindən xal alacaq.
“Qəbələ”nin “Bakı” ilə oyunlarından məqamlar
- “Bakı” “Qəbələ”nin tarixində bu komanda ilə ən çox qarşılaşan komandadır. Bu dəfəki görüş rəqiblərin 23-cü dueli olacaq.
- Əvvəlki 22 oyunda 92 futbolçu “Qəbələ” formasında meydana çıxıb.
- 2 futbolçu 10 və daha artıq matçda “Bakı”ya qarşı oynayıb: Pavel Doroşev – 12, Lyubo Baranin – 11. Samir Zərgərov və Azər Həşimov 9 belə matçın iştirakçısı olub.
- Pavel Doroşev – 1080, Lyubo Baranin – 949, Qoqa Beraya – 720 dəqiqə “Bakı”ya qarşı oynayıb.
- “Bakı”nın qapısına 13 qolu 11 futbolçu vurub.
- Vitali Balamestnı və Yannik Kamanan hamıdan çox 2 dəfə fərqləniblər.
- Vurğun Hüseynov, Samir Zərgərov, Deon Burton, Turnike Aptsiauri, Viktor Mendi, Nodar Məmmədov, Paulino Lopez Tavares, Serj Cehua, Pərvin Paşayevin hesabında 1 qol var.
- “Bakı” ilə oyunlarda 36 futbolçumuz 57 vərəqə alıb.
- 6 futbolçumuz 3 dəfədən çox cəzalanıb: Qoqa Beraya – 5, Milan Antiç - 4, Samir Zərgərov, Vurğun Hüseynov, Lyubo Baranin, Razvan Tarlea – hərəsi 3 vərəqə alıb.
- “Qəbələ”nin aldığı 2 qırmızı vərəqə Milan Antiç və Lyubo Baraninin hesabındadır.
- “Bakı” ilə qarşılaşmalarda 6 qapıçımız qol buraxıb. Nadir Şükürovla Rəşad Mustafayev hərəsi 1, Xəyal Zeynalov və Zurab Mamaladze hərəsi 3, Elnar Kərimov 5, Pavel Doroşev 14 dəfə topu tordan çıxarıb.
- 2007/08 mövsümündə ölkə kubokunun penaltilər seriyası nəzərə alınmasa əvvəlki 22 dueldə 4 penalti təyin olunub. Elnar Kərimov və Pavel Doroşev rəqib zərbəsi qarşısında aciz qalıb. Yannik Kamanan qeyri-dəqiq olduğu halda Serj Cehua 11 metrlik nöqtədən dəqiq olub.
