5 oktyabr 2012 13:50
1 qələbə ilə 3 seriyaya son
Topaz Premyer Liqasının 8-ci turunda AZAL-ın qonağı olan “Xəzər Lənkəran” 2:0 hesabı ilə qalib gəldi. Azerisport.az xəbər verir ki, bu səfər qələbəsi ilə bölgə təmsilçisi birdən-birə 3 seriyanı qırmağı bacardı.
54 gündən sonra qələbə qazanan “Xəzər Lənkəran” sonuncu dəfə avqustun 10-da “Kəpəz”i 4:0 hesabı ilə məğlub etmişdi. Bundan sonrakı 4 qarşılaşmada komanda cəmi 1 xal qazanmışdı.
Həmin oyunun evdə keçirildiyini nəzərə alsaq, son səfər qələbəsi daha əvvələ təsadüf edir. İyulun 10-da Avropa Liqasında Estoniyada “Nomme Kalyu”nu 2:0 hesabı ilə yenən “Xəzər Lənkəran” sonrakı 5 matçda qalib gəlməmişdi. 85 gündən sonra komanda rəqib meydanından 3 xalla qayıtdı.
Premyer Liqadakı son səfər qələbəsi isə ötən mövsümün “Qəbələ” ilə matçına təsadüf etmişdi. Bu il aprelin 7-də 1:0 hesablı qələbə qazanan Yunis Hüseynovun yetirmələri 6 səfərdə istəyinə çatmamışdı. 179 gündən sonra bu seriya AZAL-la görüşdə qırıldı.
