9 oktyabr 2012 14:12
AFFA-nın baş katibi azarkeşləri stadiona səslədi
Azərbaycan Futbol Federasiyaları Assosiasiyasının (AFFA) baş katibi Elxan Məmmədov bəyan edib ki, sentyabrın 22-də start götürən və artıq başa çatmaq üzrə olan FIFA U-17 qadınlararası dünya çempionatı Azərbaycan 2012 oyunları istər beynəlxalq futbol qurumlarının, istərsə də ölkə futbol ictimaiyyətinin diqqət mərkəzində olaraq böyük maraqla izlənilir. Azerisport.az xəbər verir ki, eyni zamanda FİFA U-17 Qadınlararası Dünya Çempionatı Azərbaycan 2012-nin Yerli Təşkilat Komitəsinin sədri olan Elxan Məmmədov açıqlamasında bunları dilə gətirib:
"Mundialın oyunlarının dünyanın bir çox ölkəsində yayımlanması beynəlxalq aləmdə ölkəmizin təbliğatının aparılması baxımından da xüsusi əhəmiyyət kəsb edir. Mundialın açılışında FIFA prezidenti Yozef Blatter də iştirak etdi. Sonrakı günlərdə qurumun vitse-prezidentləri İssa Hayatou və eyni zamanda, Okeaniya Futbol Konfederasiyasının prezidenti David Çunq və digər rəsmi şəxslər ölkəmizdə səfərdə oldular. Onlar da dünya çempionatının yüksək səviyyədə təşkil olunduğunu, ölkəmizdə futbolun inkişafı ilə bağlı böyük işlərin görüldüyünü bildirdilər. Onu da qeyd edək ki, qonaqların bəziləri Azərbaycana ilk dəfə gələrək ölkəmiz barədə ətraflı məlumat əldə etdilər".
Məmmədovun sözlərinə görə, FIFA U-17 qadınlararası dünya çempionatı Azərbaycan 2012-nin final qarşılaşmasında da FIFA və UEFA rəsmilərinin iştirakı nəzərdə tutulub: "Oktyabrın 13-də, Tofiq Bəhramov adına Respublika stadionunda keçiriləcək final qarşılaşmasında azarkeşləri stadiona dəvət edir, əsl futbol bayramı ab-havasını yaşamağa səsləyirik".
