9 oktyabr 2012 14:25
Aslan Kərimov: Millinin Rusiya ilə oyununda hər şey baş verə bilər
“Oyunun Moskvada keçiriləcəyini nəzərə alsaq, Rusiya yığmasının şanslarının daha yüksək olduğunu anlamaq çətin deyil. Şanslar 65-in 35-ə meydan sahiblərinin xeyrinədi. Təəssüf ki, bu oyunda hər şey istədiyimiz kimi alınmaya bilər. Lakin meydanda hər şey baş verə bilər”.
Rusiya Azərbaycanla oyun öncəsi Portuqaliya ilə qarşılaşacaq. Lakin mümkündü ki, bu oyunda İspaniya “Real”ının hücumçusu Ronaldo ruslara qarşı oynamasın: “Ronaldo Portuqaliya üçün önəmli futbolçudu. Xüsusilə də belə rəqiblərlə görüşdə komandanın ona ehtiyacı var. Ən azından standart vəziyyətlər zamanı onun necə təhlükəli futbolçu olduğunu hamı görüb”.
Kərimov yığmamıza yeni dəvət alan Dmitri Nazarovla bağlı bunları söyləyib: “Əgər keyfiyyətli futbolçudursa, niyə də çağırmayaq? Mən onun necə futbolçu olduğunu bilmirəm. Ona görə də indidən nəsə demək düz çıxmaz. Hər halda onun milliyə nə dərəcədə faydalı olacağını görmək lazımdı. Amma adi futbolçulardan fərqlənməyəcəksə, onda biz nəyə görə yerliləri qoyub, ona qucaq açmalıyıq”?
Özü də Ufuk Budak, Cihan Özkara və Əli Gökdemirdən fərqli olaraq, Nazarovun Azərbaycanla heç bir əlaqəsi yoxdu: “Əlbəttə, bütün azarkeşlər də istər ki, yığmada yalnız azərbaycanlı futbolçular çıxış etsin. Lakin istənilən halda ona şans vermək lazımdı. Məsələn, Ufuk da U-21-ə dəvət olunanda hamı onun əleyhinə çıxırdı. Amma sonradan gördük ki, o, həqiqətən də yaxşı futbolçudu, yığmanın gücünə gücə qatmağı bacarır. Şəxsən mən belə hesab edirəm ki, Nazarova da şans verməliyik. Yalnız ondan sonra hansısa nəticə çıxarmaq, qərar vermək olar”.
