9 oktyabr 2012 16:09
Joze Alesio: Barcelona ilə oyun üçün bəzi sürprizlərim var
Sabah – oktyabrın 10-da futzal üzrə UEFA Kubokunun elit raundunun oyunlarına start veriləcək. Azerisport.az xəbər verir ki, Azərbaycan çempionu “Araz” bu mərhələdə İspaniyanın “Barcelona”, Sloveniyanın “Litija” və Xorvatiyanın “MNK Split” klubları ilə mübarizə aparacaq.
Sloveniyada keçiriləcək qrup oyunları ərəfəsində Naxçıvanı təmsil edən Azərbaycan klubunun braziliyalı çalışdırıcısı Joze Alesio fikirlərini açıqlayıb: “İlkin mərhələnin oyunlarından sonra bizim yaxşı hazırlaşmaq üçün kifayət qədər vaxtımız var idi. Bu imkandan maksimum yararlanmağa çalışmışıq. Bizim planlarımızı yalnız Şikunun ailəsindəki faciə korladı. O, bununla əlaqədar ailəsinin yanında olmalı idi və biz müdafiəçiyə icazə verməli olduq. Bu üzdən müdafiə cütlüyümüzü dəyişməli olduq. Rizvan Fərzəliyevlə yanaşı Maşado Nilson oynamalı olacaq”.
Qrupdakı ən çətin oyun “Barcelona”ya qarşı olacaq. Amma braziliyalı mütəxəssis hələlik yalnız ilk oyunu düşünür: “Bizi ilk növbədə “Litija” maraqlandırır. Çünki turniri bu rəqiblə açacağıq. Ciddi rəqibdi. Onlar Gürcüstan “İberia”sı kimi güclü komandanı qabaqlamağa nail olublar. Xorvatiya təmsilçisini də sıradan rəqib saymaq olmaz. Bu komandada ölkə yığmasının futbolçuları çıxış edirlər”.
Joze Alesio İspaniya və Avropa nəhəngindən də danışıb: “Biz taktiki planda bu komandadan güclü olduğumuzu sübut etməliyik. Mənim bu komanda ilə görüşdə bəzi sürprizlərim var. Ötən mövsüm bu komandanın dördlər finalına çıxmasına mane ola bilmədik. Bu dəfə buna imkan verməməliyik”.
Heyətlə bağlı problemlərə rəğmən, Joze Alesio nikbindi: “Bizim yeganə hədəfimiz dördlər finalına çıxmaqdan ibarətdi. Ötən mövsüm istəyimizə nail ola bilməmişdik. Amma bu il kifayət qədər gücümüz var ki, qrup birincisi olaq. Mən öz komandama inanıram”.
