12 oktyabr 2012 14:35
DÇ-nin bağlanış mətbuat konfransı (FOTOLAR)
“Four Seasons” otelində FIFA və Yerli Təşkilat Komitəsi FIFA U-17 qadınlararası dünya çempionatı Azərbaycan 2012 ilə bağlı mətbuat konfransı keçirilib. FIFA U-17 qadınlararası dünya çempionatı təşkilat komitəsinin üzvü Anastasiya Tsiklas, FIFA qadın yarışlarının rəhbəri Tatyana Haenni və YTK-nın stadion, infrastruktur və IT direktoru Elnur Məmmədov fikirlərini bildirib, jurnalistlərin suallarını cavablandırıblar.
Anastasiya Tsiklas (FIFA U-17 qadınlararası dünya çempionatı Təşkilat Komitəsinin üzvü): “Bakıda gördüklərim məni yaxşı mənada xeyli təəccübləndirdi. İnsanlar turnirə çox diqqət göstərirlər. İndiyədək təşkil olunmuş dünya çempionatları arasında Azərbaycanda keçirilən dünya çempionatı ən yaxşısı idi. İnsanlar turnirə barmaqarası yanaşmadılar. Buna görə Yerli Təşkilat Komitəsinin əməyini qeyd etmək lazımdır. Bu, sıravi tədbir olmadı. Buradakı insanlar böyük şərəf hissi keçirdilər. Azərbaycan prezidentinin açılış oyununa gəlməsi böyük hadisədir”.
Tatyana Haenni (FIFA qadın yarışlarının rəhbəri): “FİFA U-17 qadınlararası dünya çempionatı Azərbaycan 2012-də təşkilatçılıq yüksək səviyyədə idi. Buna görə AFFA-nı təbrik edirəm. Onlar işin öhdəsindən çox gözəl gəldilər. Bu, yaxşı irs oldu”.
Elnur Məmmədov (YTK-nın stadion, infrastruktur və IT direktoru): “Dünya çempionatının keçirilməsi ilə bağlı Azərbaycana göstərilən etimada görə FIFA-ya təşəkkür edirik. İnanırıq ki, qadın futbolunda mühüm addım atdıq. İnfrastrukturu yaxşılaşdırdıq, böyük təcrübə qazandıq. Əminliklə deyə bilərik ki, futbol üzrə böyük turnir keçirməyə hazırıq”.
