12 oktyabr 2012 18:55
Ramin Musayev: Biz heç kimi məcbur edə bilmərik
Bu gün 2012/2013-cü il Azərbaycan kubokunun püşkatma mərasimi keçirilib. Azerisport.az xəbər verir ki, tədbirdə çıxış edən Peşəkar Futbol Liqasının prezidenti Ramin Musayev yarışların keçirilməsində şəffaflığın təmin olunmasına və heç bir narazılığın olmamasına çalışacaqlarını söyləyib:
“Bu il Azərbaycan kubokunda ötən illə eyni sayda komanda mübarizə aparır. Keçən kubok yarışında heç bir narazılıq olmamışdı. Yarışlar şəffaf və ədalətli keçirilmişdi. Çalışacağıq ki, bu kubok yarışında da belə olsun. Hər şey göz qabağındadır. Ümid edirəm ki, layiq olan qalib gələcək. Bəzi klubların maliyyə durumu imkan vermir ki, kubok yarışlarında iştirak etsinlər. Biz heç kimi məcbur edə bilmərik. Komandalar oyunçularını tanıtmaq üçün, bəziləri isə gənc futbolçuları sınamaq üçün bu yarışa qatılır. Elə komandalar da var ki, uğur qazanacağına inanmır və yarışlara qatılmır. Azərbaycan Kubokuna titul sponsorluğu ilə bağlı danışıqlar gedir. Demək olar ki, 70-80% razılıq əldə olunub. Elə də böyük məbləğ tələb etmirik. Kubok oyunları da televiziya vasitəsilə yayımlanacaq. Bu barədə problem yaşanmayacağına inanıram”.
