12 oktyabr 2012 13:06
Əfran İsmayılov: Ola bilsin ki, Türkiyəyə yollandım
“Bakı”yla oyunun hazırlıqlarını gündə 2 məşqlə davam etdirən “Qarabağ” hələ də Əfran İsmayılovun xidmətindən məhrumdu. Azerisport.az xəbər verir ki, zədə səbəbindən millinin də düşərgəsinə qoşula bilməyən 24 yaşlı yarımmüdafiəçi son durumunu dəyərləndirib:
“Zədə əməliyyat olunan ayağımdadı. Ağrılarım əməlli-başlı azalıb. Amma risk etmək qorxuludu. Zədə daha da ağırlaşa bilər. Ola bilsin gələn həftə Türkiyəyə yollandım. Orda 1 günlük müayinə olunacam. Çalışacam ki, ən qısa zamanda hazır olum”.
Əfran eyni zamanda çempionatı da dəyərləndirib: “Təbii ki, heç kim çempionatın belə maraqlı olacağını gözləmirdi. “Simurq”un lider olması, “Sumqayıt”ın iddialılar üzərindəki qələbələri maraqlı idi. Çempionatda fasilələr yaransa da, yarışa maraq azalmır. “Qarabağ”a gəlincə, mövqeyimizdən həm razıyam, həm də yox. 2-ci yer hələ ki, pis olmasa da, daha çox xal toplaya bilərdik. Çempionluğa oynayan komanda mümkün qədər az xal itirməlidi. Amma gedişat onu göstərir ki, belə oyunlar çox olacaq. Hər tur gözlənilməz nəticələr qeydə alına bilər. Hər oyunda xalın belə əhəmiyyəti böyük olacaq. İnanıram ki, daha yaxşı nəticələrlə azarkeşlərimizi sevindirəcəyik”.
