14 oktyabr 2012 13:16
Qəbələ Rusiyada ardıcıl iki məğlubiyyətlə üzləşdi
Rusiyanın Sankt-Peterburq şəhərində keçirilən “Young Talents – 2012” turnirinin qrup oyunlarına yekun vurulub. Azerisport.az xəbər verir ki, qrup mərhələsinin sonuncu – 4-cü matçında “Qəbələ”nin 12 yaşa qədər futbolçulardan ibarət komandası yerli “Zenit” kollektivi ilə münasibətlərini aydınlaşdırıb.
Matç peterburqluların hücumları ilə başlayıb. Bunun məntiqi nəticəsi kimi ilk hissə “Zenit”in 2:0-lıq üstünlüyü ilə yekunlaşıb. İkinci hissəyə isə “Qəbələ” daha fəal başlayıb. Topa nəzarəti ələ keçirən təmsilçimiz hissənin əvvəllərində hesab arasındakı fərqi azaltmağa müəssər olub. Rəqib müdafiəçilərindən ustalıqla sıyrılan Samir Qurbanov topu tora göndərib – 1:2. Hücumlarını davam etdirən komandamızda Təbriz İsazadə və Samir Qurbanovun status-kvonu bərpa etmək imkanları olsa da, onlar bu şansları dəyərləndirə bilməyiblər. Əvəzində “Qəbələ”ni əks-hücumda yaxalayan “Zenit” 3-cü topu təmsilçimizin qapısından keçirib – 1:3.
Bununla da, qrup mərhələsinin sonuncu oyununda məğlub olan U-12 5-liyi 3-cü sırada bitirib və 9-12-ci yerlər uğrunda mübarizə aparmaq hüququ qazanıb. “Qəbələ”nin bu mərhələdə ilk rəqibi Rusiyanın Kanaplov adına akademiyasının komandası olub. Matç Tolyatti təmsilçisinin hücumları ilə başlayıb. Bir gün ərzində 3-cü oyununa çıxan komandanın yorğunluğu ilk hissənin hesabında özünü göstərib – 0:2.
İkinci hissəyə “Qəbələ” daha fəal başlayıb. Ardıcıl rəqib qapısı önündə təhlükəli vəziyyətlər yaradan komandamız tezliklə hesab arasındakı fərqi azaldıb. Samir Qurbanov Orxan Abdullayevin sağ cinahdan ötürməsini dəqiqliklə tamamlayıb – 1:2. Oyunun sonlarında əks-hücumdan sonra “Qəbələ” qapısında daha bir qol görüb və meydançadan 1:3 yenik ayrılıb.
